5 прашања 5 одговори

Брисел ќе ја оценува Македонија по НАТО

Лидерот на ЛДП, Јован Манасиевски, вели дека за Брисел е важно дали прогресот е НАТО-мотивиран или е ЕУ-мотивиран

Оливера Војновска

Господине Манасиевски, минатата недела бевте во Брисел. Која беше целта на Вашата посета?

Посетата е во рамките на еден интензивен процес на лобирање во клучните европски институции, што Либерално-демократската партија го планира оваа година. ЛДП е дел од Европската партија на либерали и демократи, која е исклучително влијателна и моќна структура, и сакаме да ги искористиме предностите на таа мрежа за промовирање на државните интереси на Македонија. Еврокомесарот Оли Рен како либерал е член на таа партија и не само тој, туку од 27 комесари во Европската комисија дури десетмина се членови на Европската партија на либерали и демократи. Во Брисел имавме средби со комесарот Рен и со неговите клучни соработници за македонското досие. Најмногу разговаравме за критериумите, кои на Македонија официјално ќе и' бидат презентирани при посетата на Рен во почетокот на март. Тие критериуми, всушност, не се нови. Туку содржината е извлечена од клучните препораки што беа дел од ноемврискиот пакет документи на Европската комисија.

Според Вас, каква е атмосферата во Брисел во однос на Македонија?

Во Европската комисија се нотира напредокот што е направен, но тој се' уште се смета за лесно кршлив. За луѓето во ЕК клучно е прашањето на одржливоста на овие резултати. За нив е многу важно дали овој прогрес е исклучиво НАТО-мотивиран или е ЕУ-мотивиран. Затоа ќе биде многу битно однесувањето на Македонија по самитот на НАТО, дали тој позитивен тренд ќе продолжи или ќе застане тука. Би било многу лошо ако по добивањето покана за НАТО, се сврти старата страница. Тогаш, повторно сериозно би ги разочарале нашите европски пријатели.

За нас многу битна работа е тоа што во сите критериуми клучниот збор е имплементација, воопшто нема нови легислативни обврски. Реално, нема работа за парламентот, односно задачи за носење нови закони или измени на постојните. Оттаму, целиот товар во наредните месеци е на Владата. Таа треба да покаже посветеност и ефикасност. Притоа, многу значаен е јунскиот совет на ЕУ, кога завршува словенечкото претседателство.

Има ли во Македонија клима и чувство за да се одработи задачата како што треба?

Мора да има. Слично како и луѓето во Европската комисија, и јас се надевам дека овој прогрес не е тактички маневар, туку реална промена на политиката на Владата. Таа мора да направи конкретен план за реализација на овие критериуми и да се обиде најголем дел од тој план да реализира до јунскиот самит.

Опозицијата не е исклучена од процесите во државата. Имаше ли во Брисел некаква препорака за неа?

Критериумите што ги презентираше Рен, нивната содржина јасно укажува на исклучива одговорност на Владата, затоа што се работи за имплементација. Посебни обврски и апели до опозицијата немаше. Би го почувствувал тоа, бидејки ние како партиски колеги разговаравме отворено за проблемите. Европската комисија во изминатата една и пол година на некој начин повеќе пати беше изманипулирана во однос на решавањето на проблемите и преземањето конкретни мерки. Затоа, иако се нотира прогресот, сепак, постои воздржаност дали ќе биде одржлив. Во Брисел се' уште има извесна недоверба спрема посветеноста на Владата.

Во годината што е клучна за земјата омилена тема се предвремени избори. Како гледаат евродипломатите на ова прашање?

Комесарот Рен има една принципиелна позиција, во рамките на надлежностите на Европската комисија не зазема официјален став околу ова прашање. Но, сосема е јасно и за домашните и за надворешните набљудувачи дека какви било избори целосно би го свртиле фокусот од реализацијата на клучни критериуми на ЕУ. Така што не треба да се биде посебно аналитичен за да се разбере тоа.