Коалицијата за Европа ја почна работата

Позитивна атмосфера во Националниот совет за евроинтеграции

Тамара Грнчароска

Добивање датум за преговори и започнување на преговорите за олеснување на визниот режим се двете клучни цели за 2008 година на Националниот совет за европска интеграција на Македонија, кој беше конституиран вчера на првата своја седница, на која беше усвоен планот за работата за оваа година.

Советот во кој членуваат претставници од сите политички партии од Собранието, владини претставници, претставници на Кабинетот на претседателот на земјата и на премиерот, потоа од Стопанската комора, МАНУ, Здружението на новинарите, Синдикатот, верските заедници, од невладиниот сектор, како своја основна задача на постоење е да дава совети, насоки и предлози за работењето на државните институции за полесно и побрзо евроинтегрирање на нашата земја во ЕУ. Тој ќе ги следи приоритетите за членство на земјава во Унијата и нивното исполнување од институциите на државата.

За идното дејствување на Советот, претседателката на Националниот совет, Радмила Шекеринска од СДСМ, вчера по конституирањето, изјави дека „еден од предлозите што ги прифати Советот е да ја тргнеме маглата од тоа што се обврски на Собранието. Предлог на Националниот совет е за овие закони да имаме посебна процедура, посебна седница на која ќе се разгледуваат законите“.

Сите членови на Советот на вчерашната конститутивна седница искажаа позитивен став за неговото постоење. Консензусот како начин на одлучување во работењето на Советот беше поздравен како момент во кој Македонија ја покажува својата политичка зрелост и разграничување на државните пред партиските интереси. Шекеринска го нарече конституирањето на Советот „формирање коалиција за Европа“. „Првата седница на Националниот совет за европски интеграции покажа дека во Македонија сите сме ја научиле лекцијата и дека знаеме низ консензус да понудиме вистински решенија. Приоритетите на Националниот совет ни се веќе напишани“, изјави Шекеринска.

Позитивната енергија на конститутивната седница беше малку засенета од одбивањето на барањето на дел од членовите на Советот кои не се пратеници и тие да имаат право на глас. Тоа беше одбиено, меѓу другото, и со образложението дека пратениците имаат повисок степен на одговорност поради својот пратенички мандат, но и пред Собранието, чие тело е Советот.

Шекеринска е на став дека „духот на консензус, на желба Македонија да тргне напред, ќе доминира и во следните средби и дека Националниот совет ќе ги надмине слабостите поради кои загубивме веќе две години тапкајќи во место“. „Јас сум оптимист и очекувам дека и другите институции во Македонија ќе го прифатат нашиот апел, дека времето на кавги, на конфронтации, мора да биде зад нас“.