Враќањето на визите и натаму виси над Македонија
За ова прашање Брисел повторно ќе расправа за време на полското претседателство
Луксембург - Брисел не донесе одлука за суспендирање на слободниот визен режим за Македонија и за Србија со ЕУ, но прашањето ќе се отвори повторно за време на полското претседателство бидејќи бројот на азиланти, особено од нашата држава, е недозволив за некои од земјите членки на ЕУ.
„Ние не предвидовме суспензија на безвизниот режим за Македонија и за Србија. Механизмот за суспензија беше разгледуван денес, но не во овој контекст. Суспензијата ќе се прави во специфични услови, утврдени од Комисијата, што ќе се најде во законодавството за визите, како заштитна клаузула“, изјави во Луксембург европската комесарка за внатрешни работи Сесилија Малмстром.
Според документот на Европската комисија, разгледуван на Советот за правда и внатрешни работи во Луксембург, за враќање на визите за една земја може да се одлучи во три случаи: ако во период од шест месеци една земја на ЕУ констатира зголемување од 50 отсто на баратели од азил, или зголемување од 50 отсто на илегалци или, пак, 50 отсто повеќе реадмисии за една иста земја.Земјите од ЕУ треба притоа да се оправдаат за нивниот избор пред Комисијата, која ќе го има последниот збор. Односно, нема да има автоматизми.
Малмстром пред новинарите нагласи дека за случајот на Македонија и на Србија се водела долга дискусија на Советот.
„Јасно е дека постои вистински напредок од овие земји во повеќе погледи, но сепак постојат се уште огромен број баратели на азил, посебно од поранешната југословенска Република Македонија и Србија. Некои земји ја изразија загриженоста и за ова прашање ќе расправаме за време на полското претседателство со ЕУ“, рече Малмстром.
Таа притоа појасни дека помалку од еден процент од поднесените барања се прифатени од земјите-членки на ЕУ, инсистирајќи на фактот дека најголем број од барателите доаѓаат од ромската заедница, кои живеат во многу тешки животни услови, а кои треба да бидат подобрени, но тоа не се прави преку ноќ. За таа цел се потребни ангажирања на земјите во кои живеат, преку информативни кампањи и конкретни акции, рече еврокомесарката.
Инаку, предвидено е механизмот за привремено враќање на визите да се активира само во алармантни ситуации како крајна мерка. Ниту една од земјите-членки на ЕУ нема да може самостојно да одлучи за воведување визи, се додека на ниво на Унијата не се заклучи дека тоа е неопходно.
Официјални бројки покажуваат дека во Белгија барања за азил во мај поднеле 91 македонски државјанин. За споредба, претходниот месец, азил во Белгија побарале 100 македонски државјани. Според бројот на азилантите во Белгија, Македонија се најде на седмото место во мај, додека во април беше на петто место. Вкупно, од почетокот на 2011 година, во Белгија азил побарале 452 македонски државјани. Од сиве овие барања, статут на бегалец или азилант добило само едно лице.
Во врска со ризиците за повторно враќање на визниот режим за Македонија и Србија, белгискиот државен секретар за имиграција и азил Малшиор Ватле изјави дека тие постојат.
„Постои ризик, тоа е јасно, тој е тука. Побаравме мониторинг, постоеја извесен број на услови кои изгледа беа исполнети во 2009 година, денес повеќе не се, посебно за Македонија. Ние се уште имаме над сто случаи во Белгија, при што азил е даден на еден од барателите“, додаде Ватле. (Н.Р.) |
