Насловна

Иванов

Очекувам Нимиц да ги динамизира разговорите

11.06.2011, 15:23

Добивањето датум за преговори за влез во Европската унија за Македонија е поврзано со прашањето за името и очекуваме по конститутирањето на Собранието и изборот на Владата, медијаторот на ОН Метју Нимиц да превземе конкретни активности за да го динамизира прашањето и конечно да дојдеме до взаемно прифатливо ре��ение, изјави денеска претседателот на Република Македонија Ѓорги Иванов.

- Прво треба да им честитаме на Хрватите што добија позитивен сигнал од Брисел. Тоа е позитивно за целиот наш регион и охрабрување за Македонија. Како што кажа еврокомесарот Штефан Филе, следна е Македонија која треба да добие датум за преговори. Тоа е поврзано со прашањето за името и очекуваме по конституирањето на Собранието и изборот на Владата господинот Метју Нимиц да превземе конкретни активности да се динамизира ова прашање и да дојдеме конечно до взаемно прифатливо решение - рече Иванов.

Ваквите најави на еврокомесарот Филе, според шефот на државата, се сосема реални.

- Ние сме реалисти во Македонија. Очекуваме и грчката страна да постапува конструктивно како што и ние сме конструктивни на секој предлог од господинот Нимиц и да придонесеме регионот да живее во мир, во согласност со демократските перспективи на Балканот - рече претседателот Иванов.

Во врска со протестите поврзани со смртта на младиот Мартин Нешковски претседателот изрази длабока загриженост и рече оти сочувствува со болката на семејството Нешковски.

- Нема зборови со кои може да ја ублажиме болката на семејството, но она што можеме да го постигнеме во овој момент е институциите да си ја завршат работата. Сите надлежни во согласност со своите овластувања да дојдат до вистината и правдата да биде задоволена - изјави претседателот Иванов.

Шефот на државата рече дека се она што досега пристигнало во неговиот Кабинет тие го проследуваат до надлежните институции со барање настанот да има правна завршница и сторителот да биде санкциониран.