Насловна

Замина Лоренс од Македонија

Прекарот Иглбергер го доби за залагања да обезбеди помош за погодените од земјотресот во Скопје во 1963 година

Вашингтон - Поранешниот американски државен секретар Лоренс Игелбергер почина во саботата вечерта на 80-годишна возраст.

Иглбергер мина над 40 години во дипломатска служба и важеше за дипломат со извонредна способност за решавање кризни ситуации. Беше и добар познавач на ситуацијата на Балканот, со искуство од прва рака од регионот како амбасадор на САД во Југославија во времето кога почина претседателот Јосип Броз Тито. 

Како службеник за економски прашања во американската амбасада во 1960-тите години, го доби прекарот Лоренс од Македонија за неуморните залагања да обезбеди американска помош за погодените од земјотресот во Скопје во 1963 година. Благодарејќи на Иглбергер, во разурнатиот град набрзо беше подигната американска полска болница.

Иглбергер јавно ја поддржуваше Република Македонија и нејзиниот прием во НАТО, како и зачувувaњето на уставното име и македонските идентитетски обележја.

Лоренс Иглбергер беше ангажиран во решавањето на конфликтите во поранешна Југославија во деведесеттите години. Беше главен советник на тогашниот претседател на САД, Џорџ Буш постариот.

За време на неговата дипломатска кариера, работеше во администрацијата на Ричард Никсон, како помошник на државниот секретар Хенри Кисинџер. Истата должност ја извршуваше во администрацијата на Роналд Реган. Во последните години беше ангажиран како советник на Хилари Клинтон и на други американски официјални претставници.

По повод смртта на Иглбергер, Белата куќа издаде соопштение во кое го нарекува истакнат дипломат во служба на јавноста во клучните денови на Студената војна и падот на Берлинскиот ѕид.

Американската државна секретарка, Хилари Клинтон, рече дека тој беше непоколеблив поборник за американските вредности. Минатиот месец Иглбергер учествуваше на настан во Стејт департментот заедно со Клинтон и поранешната државна секретарка Медлин Олбрајт.

Прекарот Лоренс од Македонија го доби поради својот придонес и помошта што му ја има дадено на градот Скопје за време на катастрофалниот земјотрес во 1963 година и големата приврзаност што ја покажувал кон Македонија.

Во тој период тој работел во амбасадата на САД во Белград како втор секретар за економски прашања. Иглбергер ја менаџирал и координирал големата американска помош за настраданите од земјотресот и има огромна заслуга за подигањето на Американската воена полска болница во Скопје. Токму поради големиот гест околу помошта за градот Скопје, Лоренс Иглбергер во текот на својот мандат како амбасадор на САД во Белград (1977-1980) стекнал голема популарност. Оттогаш често доаѓал да ја посети Македонија и Скопје. Во едно од многубројните последни интервјуа, тој вели: „Не сум бил во Македонија и Скопје најмалку десет години, но се сеќавам многу добро на 26 јули 1963 година. Се сеќавам многу добро на храброста на граѓаните на Скопје по катастрофата и се сеќавам колку напорно работеа за да го изградат повторно градот. Со голема наклонетост се сеќавам и на Скопје и на Македонија“.

Лоренс Иглбергер е роден во Милвоки, Висконсин, во 1930 година. Дипломирал и магистрирал на Универзитетот во Висконсин. Од 1957 година бил ангажиран во надворешната политика на САД, работејќи во повеќе амбасади и конзулати на САД во светот.

Иглбергер беше истакнат американски дипломат од кариера. Во текот на својата богата кариера, тој секогаш бил на високи функции во Стејт департментот. Во 1992 година беше назначен за државен секретар на САД. (МИА)