Гага-викенд на Водно
Илјадници граѓани вчера ја искористија можноста да поминат гага-ден на Водно, да се повозат бесплатно на жичарницата, па дури за без пари да стасаат и до почетната станица со специјалниот автобус на ЈСП ангажиран за превоз до Милениумскиот крст. Редици љубопитни, млади и стари, уште од рано изутрината се упатија кон најновата атракција во Скопје. Ниту пеколното сонце не им пречеше да излезат од дома. Веројатно вчера пресуди гратис-користењето на жичарницата, која сепак, ја испробаа само оние најупорните, оти и два дена не беа доволни за да поминат тисканиците предизвикани од љубопитните, но и некултурните граѓани. И вчера не изостанаа турканиците кој прв да фати место во некоја од гондолите. Се чини, оние трпеливите што не стасаа на ред, сепак, ќе можат на раат да се повозат од денеска, бидејќи гратис-возењето веќе нема да важи за сите граѓани, туку само за пензионерите и за најмладите. (Дс.Т.) |
