Шара магнет за туристи
Природните убавини нудат идеални услови и за развој на селскиот туризам
Гојко Ефтоски
ТЕТОВО - „Цела Шар Планина, од врвот Љуботен, па се' до Маврово има идеални услови за развој на туризмот преку целата година, и во зима и во лето. Посебно внимание треба да се посвети на селскиот туризам што подразбира традиционален пречек на гости, понуда на еколошка храна, организирани прошетки по падините на Шара“, вели Јован Божиновски, претседател на планинарското друштво „Љуботен“ од Тетово. Тој тврди дека само преку ова планинарско друштво годишно биле организирани осум јавни посети на познатите туристички места и планински врвови: Три Води, Беловишки Водопади, Титов Врв, Ливадичко Езеро, Љуботен, а учествувале најмалку 2.000 планинари од пошироките балкански простори. Шарпланинскиот масив се протега на околу 1.600 квадратни метри од кои 57 проценти од јужниот дел и' припаѓа на Македонија, а останатите на Косово.
Природните убавини, богатството на флора и фауна, можноста за рекреирање, обилните шумски плодови, особено јагоди и боровинки се само дел од поводот што предизвикува интерес и за странско партнерство во планинскиот развој на Шар Планина.
„Преземаме се' за да ги промовираме убавините на Шара. Веќе почнуваат да се реализираат и конкретни проекти поддржани од странство. Остваруваме одлична соработка со Француската алијанса, која издаде водич на македонски, албански, француски и англиски јазик. Италијанската амбасада посредуваше за соработка со Трст, хрватски Вараждин подготвува инвестиции на Шар Планина, а Турција, преку својата амбасада, веќе инвестира во Тетово“, вели градоначалникот на Тетово, Сади Беџети.
Спортските работници од овој град, особено оние на кои планината им е посебна опсесија, сметаат дека е неминовна поголема соработка и координација со невладиниот сектор, особено во изработка на стратегија за развој на планинскиот туризам и подобрување на инфраструктурата. Во тие рамки е и предлогот за прогласување на Шар Планина како национален парк.
Планинарството и летниот туризам на Шар Планина се посебно интересни поради големиот број врвови. Шара е највисокиот планински масив на Балканот со над 15 врва што надминуваат 2.500 м. надморска височина. Сепак, нејзин бисер е Попова Шапка со блиските излетишта, особено Лешница и Јелак. Овде летата се се' попривлечни.
Од Друштвото за угостителство и туризам „Попова Шапка“ велат дека имаат секојдневни групни посети и престои не само од Македонија, туку и од странство. Помали групи планинари или само љубители на планината се чести гости, а ги има и од Чешка, Русија, Бугарија, Унгарија, Грција и од државите што произлегоа од поранешна Југославија. Од овој туристички центар најавуваат дека летово ќе биде изградена жичница-шестосед. Исто така, ќе се организираат и планинарски велосипедски тури. |
