Навалица во продавниците со користена стока

Кризите ги менуваат навиките во задолжените земји. Така е и во Шпанија. Таму цутат продавниците за продажба на користени производи, пред се', текстилните. Една четвртина од Шпанците се без работа и се штеди насекаде. „Добриот вкус не мора да значи и нешто скапо“, убедена е Ноеми Логроно. Во еден граѓански кварт во Мадрид таа држи продавница за половни текстилни производи. Порано овде, главно, тинејџерите го трошеа џепарлакот, денес таа има муштерии од сите старосни групи.

„Се' уште многумина неволно доаѓаат овде, некои дури и со грч во стомакот. Но, колку подолго трае кризата, ќе доаѓаат се' повеќе луѓе, кои никогаш во животот не стапнале во ваква продавница“, вели таа.

Владата неодамна го зголеми повторно ДДВ на 21 процент. И за оние со подобра заработувачка тоа значи - промена.

Жаклина Вилануева е адвокатка, во меѓувреме со драга волја доаѓа во продавницата на Ноеми Логроно.

„Има многу продавници како оваа. Но, ми се допаѓа стилот на оваа продавница, убаво, облеката лесно се наоѓа, сортирана е според броеви“, посочува таа.

Дали е криза или не, во Лондон или во Берлин продавниците за половна облека одамна се ценети. Трендот таму гласи - ретро. Барем во однос на модата, Европа се обединува. (Радио Слободна Европа)