Опозицијата се мобилизира за избори

И во политичката арена станува многу жешко по фијаското во ЕУ, а пред Самитот на НАТО

Александра М. Митевска

Центарот на главниот град прераснува во политички полигон на кој во период меѓу две значајни одлуки за интеграциските процеси на Македонија, партиите си ги мерат силите во очекување на изборна разврска. Со реализацијата на проектот „Скопје 2014“, плоштадот „Македонија“, дефинитивно, го изгуби статусот на вообичаена локација за митингување, како што завршија и времињата кога се водеа кампањи само пред избори.

Неодамнешниот роденденски митинг на ВМРО-ДПМНЕ на улицата „Димитрија Чуповски“ и најавениот антивладин протест на СДСМ на „Илинденска“, не само што укажаа на партиската инвентивност во откривање нови места за митингување, туку и сигнализираа дека на политичката сцена станува многу жешко спроти ноемврискиот Самит на НАТО, а откако македонските власти пропуштија уште една шанса за исчекор на следното скалило од интегрирањето во ЕУ.

Реактивирањето на ВМРО-НП и повиците на ОМ за брзи избори се уште една потврда дека опозициските партии и од левицата и од десницата го засилуваат отпорот спрема власта. Со изјавата дека ДИК е спремна да спроведе избори, независно од тоа дали ќе бидат редовни или вонредни, претседателот на изборната администрација, Александар Новаковски, ги отстрани и сомневањата дека се исполнети техничките предуслови за гласање.

Изборите можат да почнат! Премиерот Никола Груевски и натаму тврди дека не планира предвремени избори, но притоа не заборава да напомене дека е во прашање тековната година. Според тоа, не треба да се исклучи можноста за избори во почетокот на 2011 година, можеби напролет кога лошите временски услови веќе нема да бидат пречка за спроведување на кампањата. Ако се имаат предвид роковите за распишување предвремени избори и за нивно спроведување, тоа е терминот што се вклопува и во прогнозите на опозицискиот лидер Бранко Црвенковски, според кого, изборите ќе станат неминовни ако не се реши името до Самитот на НАТО во Португалија - во втората половина на ноември. Ноември, како краен рок за оваа власт за деблокирање на евроатлантските перспективи, го посочува и поранешниот премиер Љупчо Георгиевски, оценувајќи дека единствено од ДУИ зависи дали ќе има избори.

Политикологот Владимир Божиновски, пак, е сигурен: „Избори ќе има тогаш кога ќе каже Груевски“.

Според него, најавите на социјалдемократите дека од ноември ќе бараат избори се само дел од нивата превентивна тактика, бидејќи стравуваат повторно да не бидат затечени од евентуални брзи избори, како што им се случи во 2008 година.

Од друга страна, професорката Мирјана Малеска оценува дека е евидентно оти опозицијата се мобилизира и дека водечката партија во тој табор се обидува да собере што повеќе приврзаници и незадоволници и да ги качи на својот брод. „Тоа е легитимен начин за спротивставување на оние што се на власт, а за кои вие сметате дека ја узурпирале власта, бидејќи за ниту едно битно прашање не се консултираат со опозицијата, како што се прави тоа во демократски општества“, вели Малеска.

Сепак, таа смета дека се' уште не созреале условите за посилен удар на власта. Дел партии од опозицијата, како што наведува Малеска, се' уште се во фаза на консолидирање и се занимаваат со внатрешни проблеми, така што засега не е создадена клима за нивно обединување околу платформа за стратегиските цели на државата.

Според Божиновски, примарна цел на СДСМ е со најавениот митинг да покаже дека има се' повеќе приврзаници и дека регрутира ново членство. „За да го наполнат просторот пред Владата, социјалдемократите ќе мора да доведат на протестот најмалку 20 илјади приврзаници. Тоа е респектибилна бројка, особено ако се има предвид дека митингот е закажан во викенд и во период кога почнуваат годишните одмори. Сепак, ако успеат во намерата, тоа ќе биде значајна мотивација за партиското членство, а раководството ќе може да го оправда нискиот рејтинг што се' уште го има во анкетите“, забележува Божиновски.

Тој додава дека изборните резултати, сепак, не зависат од тоа колку луѓе ќе дојдат на митинг, туку колку од нив ќе гласаат за една политичка опција. Од тој аспект, како што наведува нашиот соговорник, ако во наредните 7-8 месеци СДСМ не постигне поголем подем, а кај ВМРО-ДПМНЕ нема позначителен пад, ништо посуштинско нема да се смени во распоредот на силите на политичката сцена.

„Во таков случај, по евентуални предвремени избори следната пролет, ВМРО-ДПМНЕ повторно ќе биде единствена партија што ќе може да формира Влада, сеедно дали и тогаш ќе има апсолутно мнозинство“.