Премиере, го примивме поздравот

Вашиот напад врз „Утрински“ ни даде силен импулс дека сме на вистинскиот пат

Ерол Ризаов


Премиерот и лидер на ВМРО-ДПМНЕ, Никола Груевски, го удостои „Утрински весник“ на 20-годишниот јубилеј на митингот организиран во таа чест. Во редакцијата многу сме среќни поради тоа.

Почитуван премиер, го примивме поздравот и навистина сме пријатно изненадени што ни давате толкаво големо значење. Да се чуе името на „Утрински весник“ на толку значаен датум, голем партиски јубилеј и да се чуе она „Уа“ од грлата на илјадници ваши симпатизери ни го потврди она што го знаеме - дека „Утрински“ ви е трн во окото откако дојдовте на власт.

Пред тоа, кога бевте во опозиција имавме одлична соработка. Како први комшии, редакцијата и партиското седиште на ВМРО-ДПМНЕ, тогаш често се гледавме и разменувавме мислења. Ви овозможивме да имате паралелни колумни како лидер на опозицијата со тогашниот премиер Владо Бучковски, непосредно пред изборите во 2006 година, што е голем демократски дострел и единствен случај во балканските медиуми. Тоа беше ваш единствен дуел со политичкиот противник кога веќе не излегувавте на други јавни дебати. Ви овозможивме Вам и на Вашите партиски соработници Антонио Милошоски, Влатко Чинговски, Марјан Ѓорчев, Илија Димовски во колумни да ги пласираат своите и партиските ставови. Силните афери и корупциски скандали што ја потресуваа тогашната влада поместени на нашите насловни и ударни страници ги оценувавте како висок професионализам. Веројатно, како лидер на опозицијата ќе се вративте на истото мислење за професионализмот на „Утрински“.

Почитуван премиер Груевски, без грам иронија Ве уверувам дека Вашиот напад врз „Утрински“ на митинг ни даде силен импулс и гаранција дека сме на вистинскиот пат. Дадовте голем придонес, ја стимулиравте нашата редакција во својата професионална ориентација да остане совест на македонското општество. Таман помисливме дека ни мува не Ве лази од нашите конструктивни критики за злоупотреба на власта, Вие ни кажавте јавно колку ви значат нашите размислувања, ставови и информации. Морам јавно да Ви честитам дека влеговте во историјата на балканските народи како единствен партиски лидер и премиер, кој на јавен собир на јубилеен партиски митинг нападна еден национален весник. Тоа не му појде од рака ниту на Милошевиќ ниту на Туѓман, дури и во годините кога се водеа крвави војни на бившите југословенски простори. Тие навистина успеаја од угледни весници и медиуми да направат партиски билтени за голем срам, но никогаш не се осудија на митинг или на јавен собир да анатемисаат весници, медиуми и новинари. Вие сте навистина единствен во тоа. Тоа е Ваш голем и личен успех.

Почитуван премиере, ние во „Утрински“, сите до еден потпишавме декларација на ОБСЕ, која не' обврзува на високи морални и етички критериуми на слобода и независност во нашето работење и на самостојна уредувачката политика. Не разгоруваме верска, расна и меѓуетничка омраза. Нашата ориентација е европска Македонија во секоја смисла на зборот.

А, во што Вие се заколнавте кога станавте премиер. Дали една работа остваривте од македонските национални и стратегиски интереси и приоритети. Наша должност е постојано да Ве потсетуваме додека сте на власт дека главната работа на сите влади и премиери е да обезбедат поквалитетен живот на своите граѓани, поголем личен и општествен стандард, повеќе работни места, поголема сигурност и безбедност, подобри меѓуетнички, меѓуверски и меѓучовечки односи, почитување на законите, функционирање на правната држава, помалку криминал и корупција и подобра и почиста човекова околина. Што Вие остваривте од тоа? Можеби и за тоа сте толку лути на нашиот весник, бидејќи постојано Ве потсетуваме на Вашите работни обврски и ветувања.

Другите големи стратегиски интереси на Македонија беа и останаа НАТО и во ЕУ. До каде сме сега на тој пат. Пет години стоевме во место, а сега сме чекор поназад. Можете да тешите дел од граѓаните со споменици, музеи, стадиони, земјоделски субвенции, поголеми пензии, помали даноци. Можете да предизвикате еуфорија со потрагата по антички корени и пославно минато. Можете да ги купувате медиумите со пари за реклами што не се реклами. Но, и тоа има рок на траење. Премиере, имаме минато со кое може да се гордееме, ама иднина немаме, од тоа ќе се срамиме.

Должност на секоја демократска власт е да обезбеди непречена работа на медиумите и на новинарите. Тоа се јавни сервиси на граѓаните. Вие таа ваша обврска не само што не ја исполнувате туку лично ��ако македонски премиер на сите граѓани ја попречувате професионалната работа на медиумите. Јавно им се заканувате на медиумите и на новинарите по митинзи и во провладини телевизии и весници, ги уценувате, ги подмитувате и ги корумпирате медиумите, а за срам на македонската демократија со некои медиуми воспоставивте партнерски односи. Бидете сигурни дека тие ваши партнери купени со пари на граѓаните први ќе ви го свртат грбот кога еден ден, по логиката на политиката, ќе заминете во опозиција. Јас знам дека, ние, денешните ваши големи критичари ќе ја работиме истата работа кога ќе дојде друга власт, како што и досега истото го работевме.

Барате, лично и преку вашите партиски институти балансирано медиумско третирање на власта и на опозицијата и за тоа, исто така, трошите буџетски пари, за да и' докажете на јавноста дека имало повеќе критика за работата на власта, отколку на опозицијата. Па каде се чуло и видело власта и опозицијата подеднакво да бидат одговорни за вкупните состојби во државата. Посочите една демократска земја каде што медиумите повеќе пишуваат за опозицијата, отколку за тоа што работи власта. Господине премиер, тоа е можно само во земјите каде што нема демократија.

Почитуван Груевски, Вие сте ми седми премиер чија работа ја следам професионално во независна Македонија. Се надевам дека ќе го дочекам и го испратам и осмиот и деветтиот... Тоа ќе биде добра вест за Македонија. Уште првиот ден од вашето доаѓање на власт Ви напишав кој е вашиот најголем проблем. Вие не сте демократ. За тоа треба голема широчина, општа и политичка култура, но и храброст. Не инвестирате ниту во себе ниту во Македонија.