Иванов и Медведев се договараа за „Јужен поток“

За Ставр��ски соработката не значи дека Македонија влегува под друго влијание, туку е прагматична

Руската енергетска компанија „Гаспром“ се согласи да ја вклучи Македонија во проектот за гасоводот „Јужен поток“, изјави вчера македонскиот претседател Ѓорге Иванов по средбата со рускиот колега Дмитриј Медведев во Санкт Петербург. „Наши експерти имаа анализи дека Македонија останува изолирана од гасоводите ’Набуко‘ и ’Јужен поток‘, но оваа најава отвора можност за добивање евтини енергенси, а ќе значи енергетска стабилност на земјата“, изјави Иванов.

Министерот за финансии, Зоран Ставрески, нагласи дека со изградбата на коридор од „Јужен поток“ кон Македонија, земјата влегува на меѓународната мапа на енергетски транспортни коридори, а дополнително со потпишувањето на договорот за намирување на клириншкиот долг на Русија кон Македонија се отвора вратата за дополнително унапредување на соработката меѓу двете земји. Тој нагласи дека соработката со „Гаспром“, покрај изградбата на кракот од „Јужен поток“, предвидено е да опфати и развој на гасна мрежа низ Македонија и учество на рускиот енергетски гигант во изградбата на гасни електроцентрали и евентуална трансформација на ТЕЦ „Неготино“ во гасна електрана. „Со потпишувањето на договорот за клириншкиот долг Македонија ќе ја унапреди соработката со еден енергетски гигант, како што е ’Гаспром‘ и со Руската Федерација во целина“, нагласи Ставрески.

Тој потенцира дека реализацијата на проектот за гасификација чини околу 300 милиони евра, а еден дел ќе се покрие со клириншкиот долг од 60 милиони долари и со 15 милиони долари што ќе ги вложи Македонија. Според Ставрески, руската страна изразила подготвеност за финансирање и на останатиот дел од средствата, но засега се разгледуваат и други можности за реализација на вкупниот проект. Ставрески нагласи дека соработката со „Гаспром“, не значи дека Македонија влегува „под друго влијание“, бидејќи во економската сфера и во меѓународната политика главен пристап е прагматизмот, а за македонските граѓани е најдобро да постојат алтернативи за обезбедување енергенси. Според него, Македонија ќе направи се' за вклучување во „Јужен поток“, но и во гасоводот „Набуко“, како и во останатите енергетски траси што ги преферира ЕУ. „Гаспром“ наскоро ќе испрати експертски тим, кој ќе ги определи перформансите на гасификацијата, со што ќе се овозможи македонското стопанство да добива евтин гас. Експертскиот тим ќе го утврди и правецот на кракот од „Јужен поток“ низ Македонија, по што би следувало потпишување на меѓувладин договор за реализација на тој проект. (Ек.Р.)