Поглед

Потрага по гробови

Тамара Грнчароска

Косово ни одржа лекција како се трага по сопствените граѓани што исчезнале во вооружен конфликт. Државата, која пред нецели две години се здоби со државност, тргна најбрзо што може по трагата на 1.500 лица, кои ги води за исчезнати во војната во 1999 година. И тоа, ни повеќе ни помалку, туку по некои од нив и на туѓа територија. Во Македонија. Со точни локации на гробовите и приближен број од околу 40 тела во нив, Косово од Македонија побара да ги испита гробиштата „Бутел“ во Скопје и уште четири места во меѓуграничниот простор. Притоа министерот за правда на Косово бара лично да ја види локацијата во Бутел.

Во Македонија пак како за табу тема се молчи за судбината на исчезнати македонски цивили во конфликтот од 2001 година, чија официјална ��ројка е 23. Трагањето по македонските цивили, кое во првите години по конфликтот се правеше поради силниот притисок од јавноста и од нивите роднини, денес девет години потоа има епилог само за тројца од нив, за Димитрие Димовски, Симеон Јакимовски и за Крсто Гогоски, чии тела беа пронајдени во гробницата кај Требош. Судбините на уште девет од 12 киднапирани Македонци од Тетовско и шестемина исчезнати Албанци, остануваат мистерија и случаи заглавени во нечија фиока.

И сега додека македонските власти се подготвуваат да му излезат во пресрет на Косово и да ги проверат наводите за постоење гробови на нивни цивили на наша територија, гробовите на исчезнатите македонски цивили се' уште чекаат да бидат откриени. Заборавени од властите, но не и од нивните семејства и јавноста, судбината на исчезнатите македонски цивили е нешто за што не смее да се молчи доколку се сака, конечно, да се затвори темната страна од поновата македонска историја.