Македонците во Албанија извисија за пописот

Македонците во Албанија ќе го бојкотираат претстојниот попис во април годинава бидејќи Албанскиот институт за статистика не ги прифати барањата за посебна графа за националност Македонец во пописниот формулар, најави претседателот на партијата Македонска алијанса за европска интеграција, Едмонд Темелко.

Според Темелко, се покажале оправдани стравувањата дека албанските власти на секој начин ќе се обидат да прикажат колку што е можно помал број малцинства во државата.

„Повторно во овој формулар не постои графа за Македонци и за сите други малцинства во Албанија. За да бидеме делумно задоволни, тие направија варијанта каде што не постои ниту едно малцинство, туку празно место за етничко изјаснување. Ова го усложнува процесот бидејќи во формуларот има една точка во која се вели ’преферирам да не се изјаснувам‘, која им дава можност на сите граѓани во Република Албанија, кои што се под притисок, да не можат да се изјаснат на која националност и' припаѓаат. Ние категорично ја отфрламе оваа верзија, остануваме на нашиот став. Ќе учествуваме на пописот доколку постои графа Македонец. Доколку не, ќе повикаме на бојкот и не го признаваме пописот што е закажан за април“, вели Темелко.

Иако засега нема официјална најава, по последните безредија во Албанија не е исклучено и одложување на пописот што треба да се одржи во април, еден месец пред локалните избори. (MИA)