Поглед

„Иди, иди несанице!“

Жаклина Ѓорѓевиќ

Да имаа право на уште по некоја новогодишна желба министрите, најверојатно, ќе посакаа да имаат подобар сон бидејќи како што тргнале тоа ќе им остане неостварена желба и во оваа година. Цели петнаесет часа траеше завчерашната владина седница во која, барем според изјавите на владиниот портпарол, присуствувале сите министри, со исклучок на шефот на дипломатијата.

Портпаролот Мартин Мартиноски вели дека вакво темпо на работа „не е ништо невообичаено за оваа Влада“. И, можеби е оправдано да се работи прекувремено. Но, прашање е дали е можно некој цели 15 часа да размислува и да одлучува со иста доза на внимание. Нели на некој од министрите му доаѓаа да си дремне одвреме-навреме?

Се почесто седниците им завршувале по полноќ, а често дури и ги зазорувало во министерските фотелји пред да ја напуштат салата во Владата. Ги прашува ли некој дали се преморени, болни, им недостасува ли нешто? Еден од министрите, како што дознавме, се почувствувал преморен на завчерашната седница, но не ја напуштил, туку побарал да му донесат „фервекс“.

Изгледа како министрите да се тркаат, тестирајќи се колку можат најдолго да останат на владините средби, обидувајќи се да докажат дека работат 24/7. А што одлучуваат на овие маратонски седници, тие самите најдобро си знаат. Еве, на завчерашната седница, на пример, најмногу се дискутирало за вработувањата на медицинскиот персонал.

Ме насмеа еден од министрите, кој вели: „Јас немам проблем, можам со часови да седам на седница и не ми е потребно ни кафе за да ме одржи буден“. Па, се прашувам до каде се границите на човечката издржливост?