Ѓоковиќ го „исчисти“ Федерер

Српскиот тенисер го елиминира бранителот на титулата во Мелбурн парк во три сета (7:6, 7:5, 6:4)

Новак Ѓоковиќ е прв финалист на Австралија опен. Извонредните изданија на српскиот тенисер во Мелбурн кулминираа вчера претпладне кога во три сета (7:6, 7:5, 6:4) го елиминира бранителот на трофејот, Роже Федерер.

„Неверојатен е притисокот да се игра и да се победи Федерер. Го одиграв еден од најдобрите мечеви во последно време. Морав да ризикувам и да се обидам да ги искористам своите шанси. Ако го загубев вториот сет, кој знае што ќе се случеше. Можеби Федерер ќе направеше голем пресврт и затоа сум задоволен бидејќи го одиграв најдобриот тенис во најтешки моменти“, рече Ѓоковиќ.

Федерер признава дека наиде на подобар и помотивиран противник во полуфиналето на Австралија опен 2011.

„Искрено, лесно можев да одиграм уште два сета, бев подготвен за нив. Но, штета е што не успеав да се изборам за нив. Ќе беше извонредно ако победев по петти пат овде, но овојпат беше невозможно тоа“, изјави Федерер.

„Мислам дека не играв лошо, но Ѓоковиќ беше одличен. Тоа мора да го признам и да продолжам понатаму. Ова не е крај на ништо, ова е само почеток на мноштвото предизвици кои претстојат“, дополни швајцарскиот ас.

Тој се осврна и коментарите дека тука некаде можеби е крајот на неговата ера и ерата на Надал од причина што ова ќе биде прв случај по Австралија опен 2008, а во финалето да ги нема двајцата најдобрите светски тенисери.

„Малку е рано да се носи таков заклучок, ајде да разговараме за тоа по шест месеци. Се чувствувам добро, голем оптимист сум пред претстојните 15 турнири или колку и да бидат во текот на сезоната. Задоволен сум што играм и тоа ми е најважно“, заврши Федерер.

За водечките швајцарски медиуми поразот на Федерер од Ѓоковиќ е голем неуспех.

Циришки „20 минути“ излезе со наслов „Ѓоковиќ го симна Федерер од тронот“, а настапот на својот сонародник во извештајот е опишан со еден збор „Неуспех“. И не чуди бидејќи за успех се сметаше само одбрана на титулата.

„Ѓоковиќ заврши работа со Федерер во три сета!“ е насловот во швајцарската верзија на „24 часа“ чии новинари нагласуваат дека годината не почна како треба за Федерер затоа што уште на стартот остана без еден од трофеите во 2010 година.

„Базел Цајтунг“ приказната од Мелбурн ја наслови како „Супериорниот Ѓоковиќ го победи Федерер“, а „Базеландшафтлиш“ наведува дека „Роже по овој пораз и значајното губење на бодови тешко дека повторно ќе стигне до првото место на светската ранг листа“.