Се краде се' што е вредно од железницата

Крадците не се плашат да посегнат и по делови од системите што се под висок напон

Сања Наумовска



Делови од пруга, кабли, техничка опрема на рампите и на железничките станици...Од железницата се краде се' и сешто. Речиси е невозможно да се фатат крадците на дело, особено оние што крадат во непристапните предели каде што поминува железничката пруга. Најмногу на цена се деловите што можат лесно да се препродадат на отпадите или на дивите пазари. Кражби по пругите и во возовите имало секогаш, велат во „Македонски железници“, но крадците во последниот период се посебно активни. Најмногу на удар се каблите поради бакарот, кој достигнува добра откупна цена на отпадите, како и акумулаторите со кои се напојуваат делови од уредите за сигнализација покрај пругите. Во некои делови од земјата, каде што нема голема фреквенција во железничкиот сообраќај, во последно време се крадат и металните шрафови со кои се прицврстуваат пругите. Бидејќи станува збор за специфична опрема што се користи само во железницата, некои од украдените материјали ги пронаоѓа полицијата на отпадите, но на огромен дел им се губи трагата. Штетите што ги трпат „Македонски железници“ се големи. Сепак, велат во ова јавното претпријатие, опасноста од загрозување на безбедноста на луѓето што секојдневно ги користат услугите на железницата е уште поголема.

Како резултат на кражбите во последниот период, во МЖ - „Инфраструктура“ се соочуваат со зачестени испади во системите. Оштетените делови од технолошко-техничката опрема тешко се надоместуваат, а додека се надвор од функција, на многу опасност се изложени и вработените и патниците. Во МЖ нагласуваат дека се работи за системи под висок напон, па секој што ќе посегне по нив ги изложува на голем ризик за животот и себе и другите.

„Ако не работат системите за осигурување на патните премини преку пругите што сигнализираат наидување на воз, се соочуваме со ситуации на небезбедно преминување што многу често можат да имаат фатален крај“, вели Петар Спасовски, помошник-директор за комуникации во МЖ. Нагласува дека со засилени контроли ќе се обидат да обезбедат доследно да се спроведува законската забрана за неовластено движење и задржување на пругите и на пружниот појас.

„Граѓаните се должни да го почитуваат и да го штитат имотот на железницата како добро од општ интерес. Оние што ќе се фатат на дело како крадат на пругите и на постојките ќе бидат најстрого санкционирани согласно со Кривичниот законик и Законот за сигурност во железничкиот систем“, соопштуваат од МЖ „Инфраструктура“.