Неделен барометар

Џулија Робертс со награда за животно дело

Холивудската актерка Џулија Робертс е добитничка на специјалната награда за животно дело „Доностија“, која и' беше врачена на филмскиот фестивал во Сан Себастијан во Шпанија. Наградата и' ја предаде партнерот од филмот „Јади, моли се и сакај“, Хавиер Бардем, кој истакна дека Робертс е исклучителна актерка. „Таа е способна за улоги во филмови од различни жанрови и може на гледачите лесно да им ги пренесе сите видови емоции“, додаде Бардем.

„Беј д фиш“ за без пари

На официјалниот сајт на македонската група „Беј д фиш“, www.beithefish.com, бесплатно може да се симне најновиот сингл „When he was young“, кој претставува звучен предвесник за нивното најново студиско издание. На албумот, кој е во процес на изработка и треба да излезе во април наредната година, македонскиот електро поп-состав интензивно работеше во изминатиов период. Новото цеде е петта музичка приказна по „What are you fighting for“, „Look up“, „Marat sade“ и „Time to make things right“, не вклучувајќи ги театарските остварувања и неофицијалните независни изданија. Од групата најавуваат концептуален албум, на кој како и секогаш, повторно ќе експериментираат со својот звук.

Како гостин на најавеното парче ќе се појави Ола Диос, хип-хоп артист од Англија со македонско потекло. Воведната, промотивна тема од идното парче од веќе почна да се врти на радиофрекфенциите низ земјава, а бендот најави дека е во подготовки и на видеоспот за новиот сингл што ќе го прават фотографот Дарко Мораитов и стилистот Даниела Симоновска. Премиерата се очекува во октомври на регионалниот музички канал Ем-Ти-Ви.

Британскиот алтернативен рок-состав „Вајт лајс“ на 4 декември доаѓа во Скопје, а настапот на годинешниот музички фестивал „Таксират“ го навестија и на својот официјален „Мајспејс“ профил. Членовите на групата, кои претходната година од „Кју“ беа прогласени за најдобар млад состав, доаѓаат во Македонија по светската турнеја и настапите во Италија, Сад, Мексико, Белгија, Хрватска и во Србија.

Џек Лоренс, клавијатури и тапани, Хари Меквеј, вокал и гитара и Чарлс Кејв, басист и текстописец, го започнаа музичкиот поход во 2004 година, но откако не зграбија премногу позитивни критики со поп-рок звукот на „Фиар од рок“, тројцата момци се решија на малку поалтернативна, позрела варијанта - „Вајт лајс“. Од формирањето во 2007 година издадоа неколку успешно примени теми, а претходната година го издадоа и првиот албум „Ту луз мај лајф“, кој својата промоција ќе ја има и во „Метрополис арена“ заедно со неколку композиции од планираниот албум за почетокот на 2011 година. (Б.Ш.)