„’Мама‘ - тоа сум јас“, се јави Муса Џафери

Министерот за локална самоуправа потврди дека тој е еден од функционерите на ДУИ за кого е доставено досие до лустраторите

Светлана Унковска

„Добро знаете кој е тоа, да - тоа сум јас“. Вака министерот за локална самоуправа, Муса Џафери, вчера потврди дека тој е еден од тројцата функционери на ДУИ за кои професорот Шпенд Љуши поднел досие до Комисијата за лустрација. По потпишувањето на договорите за имплементација на проектите за меѓуопштинска соработка за доделување грантови со кои ќе се финансираат локални проекти, министерот Џафери одговараше на прашањата на новинарите за обвинувањата дека бил кодош.

Тој вчера ги отфрли тврдењата дека бил соработник со тајните служби и рече дека се работи за валкани игри на ДПА, која сака да искомпромитира одредени личности. И лидерот на ДУИ, Али Ахмети, завчеравечер, само неколку часа откако беа предадени досиејата, во емисија на Втората програма на МТВ истакна дека сето тоа е фабрикувано од нивниот политички опонент ДПА, а за професорот Љуши најави тужба.

„Се согласувам дека ДПА сакаше да има ефект и да направи тема во медиумите. Претпоставувам дека поранешните структури на УДБА се' уште имаа фосили или некои кои имаат долг кон тие служби. Но, за жал, и професорот ќе биде првата жртва на оваа валкана игра, бидејќи тој има долг кон некого и мора да ја игра оваа улога“, изјави министерот Џафери. Во неговото досие со псевдоним „Мама“ имало два документа, според кои тој од Службите на поранешната државна безбедност на два наврата добил 40 илјади австриски шилинзи и 25 илјади швајцарски франци. Тој рече дека веќе го добил и ја разгледал содржината на досието и најави дека лично ќе се ангажира да ги провери фактите.

„Својот личен интегритет ќе го бранам пред институциите и тоа и пред домашните, но и пред меѓународните“, најави министерот Џафери.

Во Комисијата за лустрација с е' уште не ги отвориле досиејата на тројцата функционери на ДУИ. Претседателот на Комисијата, Томе Аџиев, вели дека тие се' уште не ги разгледале, но кога ќе започне процесот на утврдување на фактите, ќе можат да кажат дали се работи за веродостојни документи, на досиеја за кои се тврди дека се донесени од Белград.

Лидерот на ДУИ, Али Ахмети, најави дека ќе поднесе тужба против професорот Љуши. Тој во емисија на Вториот канал на МТВ рече дека документите, најверојатно, се фалсификувани, односно дека целиот тој потег е фабрикуван од нивниот политички опонент ДПА.

„Против професорот Шпенд Љуши ќе поднесеме тужба, бидејќи сметаме дека документите што ги доставил се фалсификувани. Тие досиеја кои на чуден начин ги добил како да му ги доставил некој гулаб, па затоа сметаме дека оваа дилема треба да се расчисти со тоа што ќе поднесеме тужба. Се обвинуваат личности кои имаат голем кредибилитет кај албанскиот народ и се сака да се фрли дамка врз авторитетите на државата. Ова е нечесна битка, ова е прогонување и најостро го осудуваме“, рече Ахмети во емисијата на МТВ 2.

Во ДУИ веќе ја разгледуваат можноста за поднесување тужба против професорот кој ги донесе досиејата, но истовремено велат дека ќе сакаат да слушнат и да видат со какви ставови ќе излезе Комисијата за лустрација во врска со содржината во папките. Очекуваат дека лустраторите набрзо ќе излезат со свое решение.

„Ги повикуваме сите надлежни институции да се ангажираат за да ја докажат релевантноста и веродостојноста. Се разбира, и да дадат одговор за тоа што содржат и какви се овие т.н. досиеја за да не се дозволи понатамошни манипулирање со процесот на лустрација. Најважно од се' е да не се дозволи овој процес да стане уличарски процес што се спроведува на арогантен начин и, уште пострашно, процес што се спроведува заради политички цели и интереси“, порача вчера Ермира Мехмети од ДУИ.