Грција во заложништво

Папандреу најави дека со сила ќе го прекине штрајкот
на превозниците на бензин

Миркица Поповиќ


Грчката влада се обиде да го примени правилото „ако не сакаат со добро, тогаш со лошо“ на сопствениците на камиони и цистерни, кои штрајкуваат уште од неделата. Во средата вечерта премиерот Јоргос Папандреу повика на граѓанска мобилизација и најави присилно прекинување на штрајкот, кој речиси цела недела ја блокира државата и го става во голема опасност јавното здравје. Вчера одборот на штрајкувачите се сретна со министерот за транспорт и врски, Димитрис Репас, но и по четири часа разговори, до затворањето на весникот, средбата не беше завршена.

Независно од барањата на штрајкувачите, грчката влада вчера беше решена да стави крај на блокадата на возачите и сопственици на камиони и цистерни. „Владата е отворена за дијалог со штрајкувачите, но не можеме веќе да дозволиме да се парализира државата“, истакна генералниот секретар на министерството за транспорт и врски, Харис Циокас. Жестоко реагираше и министерот за економија, Јоргос Папаконстантину. „Никакво барање, никаква посебна група граѓани нема право да го држи цело грчко општество во заложништво и да ја парализира земјата“, изјави министерот.

По наредбата на Папандреу, грчкото министерство за транспорт и врски започна со издавање на листови за мобилизација на камионџиите и сопствениците на цистерни, со кои се обврзуваат да продолжат со работа во рок од 24 часа и да започнат да ги снабдуваат бензинските со гориво. За оние што ќе одбијат да ги пополнат формуларите и да продолжат со работа, предвидени се драстични мерки, меѓу кои итно апсење и затворска казна и можност да ги изгубат дозволите за превозници.

Првата реакција на штрајкувачите беше дека одбиваат да се мобилизираат и доколку е потребно, ќе лежат и в затвор. „Мобилизирајте ги нашите возила, ама нас не можете да не' мобилизирате“, изјавија некои од штрајкувачите, одбивајќи да ги возат своите камиони или цистерни. Некои од штрајкувачите истакнаа дека е можно да не ја игнорираат одлуката директно, но дека ќе најдат други начини да штрајкуваат.

Вчера изутрината дојде и до жестоки судири меѓу штрајкувачите и полицијата пред министерството за транспорт и врски во Атина. Инцидентот започнал кога околу 1.500 штрајкувачи се обидоа да влезат во министерството. Откако им бил забранет влезот од страна на полициските сили, штрајкувачите започнале да фрлаат со шишиња кон влезот на министерството, по што полицијата употребила солзавец.

Петте дена штрајк и блокирање на приватните цистерни на нафтените компании, освен што доведоа до комплетна ��аника и нафтена криза, заглавија и голем број домашни и странски туристи во Грција, но ги искомплицираа работите и за болниците, маркетите и земјоделците-производители. Иако засега дотурот на лекови во болниците се одвива без проблем, во некои од маркетите снемуваат резерви од зеленчук, а земјоделците од островите се жалат дека доколку набрзо не заврши штрајкот, ќе имаат сериозни проблеми со овошјето што треба да го пласираат на домашните пазари, но и да го извезат на странските.

Туристите низ цела Грција, но и оние што планираат да заминат викендов се во исчекување. Голем број туристи од Италија, Германија и од Холандија, кои од 1 август имаат колективни одмори, а често доаѓаат во Грција со приколки, се на стенд-бај дали ќе може да остварат зацртаните планови за летување кај нашиот јужен сосед.

Македонското министерство за надворешни работи им препорача на граѓаните што планираат да заминат за Грција со патнички возила да ги наполнат резервоарите со гориво пред да влезат во Грција, а и да внимаваат на количеството гориво неопходно за враќање назад. Се препорачува и да ја следат состојбата во Грција и доколку дојде до некакви проблеми, да го контактираат МНР и македонските дипломатски претставништва во Атина и во Солун.

Со слично предупредување излезе и српскиот амбасадор во Атина, апелирајќи до српските граѓани што патуваат за Грција да наполнат гориво на последната бензинска пред граница во Македонија. Повеќе од 100.000 Срби се заглавени во Грција поради немање гориво.