Брачен пар во Франција си уби осум новороденчиња

Мајката ќе одговара за смислени убиства, а таткото за криење на злосторството

Од нашиот дописник Тони Гламчевски

Стразбур - Остатоци од тела на осум новороденчиња беа пронајдени во градината на една селска куќа во Виле-о-Тертр, на северот од Франција, при испитувањата направени од страна на истражните органи на 27 и 28 јули. Ова е сигурно едно од најгрозоморните случаи на убиства на деца во Франција.

Остатоците од бебињата беа пронајдени од страна на новите сопственици на куќата, која им припаѓаше на родителите на уапсената жена. Тие копајќи во градината за да изградат базен ги најдоа коските од првите две тела на бебињата закопани во градината, по што веднаш ја известија локалната жандармерија. Истражните органи, помогнати од пет специјално дресирани кучиња, детаљно ја претресоа куќата при што најдоа уште шест тела на бебиња. Пребарувањата, како што јавуваат француските медиуми, завршиле во средата вечер.

Истражните органи ги уапсија мажот и жената за кои постои сомневање дека се родители на пронајдените мртви бебиња. Тие од соседите се опишани како луѓе без некои посебни приказни, услужни и љубезни. Мажот за кој се сомнева дека бил татко на бебињата е член и на општинскиот совет на Виле-о-Тертр. Градоначалникот на Виле-о-Тертр, Патрик Мерсие, за првоосомничениот вели дека тој веќе трет мандат е во општинскиот совет, секогаш доброволец за акции и многу почитуван од соселаните. За жената, за која се верува дека е мајка на осумте бебиња, во селото се вели дека излегувала ретко и малку била вклучена во животот на селото. Некои велат дека таа имала „проблем со дебелината“, што може да се објасни што никој не забележал дека таа осум пати била трудна. Првиот човек на општината за француските медиуми објаснува дека никој не забележал ништо. Уапсената двојка истовремено има две девојки на возраст од дваесетина години, кои, исто така, имаат деца.

Истражните органи од Дуе веќе потврдија дека пронајдените коски во градината се детски коски на новороденчиња. Тие, исто така, ги пронајдоа поранешните жители на куќата, две лица за кои се сомнева дека се родители на осумте бебиња, кои се на возраст од 45 години. Тие не се преселиле многу далеку од поранешниот свој дом и живееле во близина. Според француското приватно радио РТЛ, жената, наводно, признала дека убила десетина новороденчиња, родени по бременоста која систематски ја криела од својот сопруг. Но, судските истражни органи не ја потврдуваат оваа верзија на радиото.

Најновиот грозоморен настан личи многу на оној на брачната двојка Куржо, при што сопругата во 2009 година беше осудена на осум ��одини затвор за убиството на трите нејзини новородени деца, починати во 1999 година во Франција и во 2002 и 2003 година во Јужна Кореја, без знаење на нејзиниот сопруг.

Според некои процени, во Франција годишно има меѓу 800 и 2.000 бремености, кои се игнорирани, намерно или ненамерно, од бремените жени поради различни психолошки проблеми, но многу малку се оние што одат до убиство на своите новородени бебиња. А, оние што го починуваат тој страшен акт, најчесто ги чуваат мртвите бебиња блиску до себе. Сопругата на Куржо ги чуваше во сандак за длабоко замрзнување, каде што беа случајно откриени од сопругот. Инаку госпоѓата Куржо, во длабока анонимност, неодамна беше ослободена од издржувањето затворска казна и се врати во семејството каде што и натаму се грижи за своите поголеми деца.