Антинато амбасадор ќе оди во Алијансата

Според Мартин Треневски, Алијансата во А��ганистан трпи сериозни загуби, па Македонија треба да го варолизира тоа во своја полза

Тамара Грнчароска

Скандалозната платформа на новоименуваниот амбасадор на Македонија во НАТО, Мартин Треневски, вчера беше презентирана пред собраниската Комисија за надворешна политика.

Поблиску до антинатовска агенда отколку до план како земјата да се приближи и да го надмине проблемот кој не' спречува да станеме членка - спорот со името - Треневски вчера рече оти Алијансата со поддршката што и' ја дава на Грција врши „политичка и економска агресија врз нашата земја“. Но, Треневски во своето експозе не се задржа само на неправдата што се врши од страна на НАТО врз Македонија во контекст на блокираниот прием, туку дополни „НАТО е во сериозна криза и на Алијансата не и' цветаат рози ни на геостратегиски ни на воен план“.

Платформата на Треневски се базирала врз, како што наведува, очигледното, а тоа е „Алијансата во Авганистан трпи сериозни загуби, што не би било лошо Македонија да ги варолизира во своја полза: Кога веќе на Алијансата не и' цветаат рози да се инсистира на продолжување на процесот на проширување со земји, кои ги исполнуваат стандардите и условите за членство, во прв план Македонија, па и со Црна Гора и со БиХ“.

Дури и последната донаторска конференција за Авганистан тој ја нарече „повеќе пи-ар отколку реaлна можност работите да се променат“. Треневски презентираше и неостварливи цели, како, на пример, менување на заклучоците од Самитот на НАТО во Букурешт! „Ќе барам да се коригира заклучокот од Букурешт и да се промени односот кон нас“, рече Треневски.

Политичкиот услов кој Македонија го доби во Букурешт за членство, решавање на спорот за името, Треневски го оцени како „бирократско-чиновнички пристап кон проблемот издигнат на ниво на политички став на Алијансата“.

Презентирајќи ја платформата со која треба да ги застапува интерес��те на државата во НАТО, Треневски изнесуваше и лични чувства. Притоа тој оцени дека таму има група пријателски земји преку кои треба да се лобира, а со кои тој контактирал додека бил во Канада, со што неговите ставови веќе, условно, се стигнати во НАТО. Во групата пријателски земји Треневски ги вброи Словенија, Турција, Чешка, Словачка, балтичките земји и посебно Полска, за која рече дека е во срдечни односи со САД и со Франција, а Германија настојува да не и' се забележува поради нејзините гревови кон Полска во Втората светска војна“.

Треневски во платформата како иден амбасадор на Македонија во НАТО ја вклучи и македонската дијаспора, па смета дека со нејзина помош може да обезбеди американскиот претседател Барак Обама да го прими македонскиот претседател Ѓорге Иванов пред самитот во Лисабон, во ноември. Тој изрази и загриженост дека прифаќањето на грчките барања од наша страна во поглед на името „дефинитивно ќе значи капитулација пред агресијата што се врши врз нашата земја над две децении“. „Предупредувам дека евентуална промена на името на нашата држава ќе доведе до нагло ’ладење’ и дистанцирање на најголемиот дел од македонската дијаспора, особено на Македонците по потекло од егејскиот дел кон Македонија, што веќе еднаш се случи при откажувањето на симболот - шеснаесеткракото сонце во 1995 година. Негативните последици по интересите на земјава ќе бидат непроценливи“, заклучува Треневски.

Идниот амбасадор во НАТО, освен што презентираше политички ставови што се многу дискутабилни дали навистина ги промовираат интересите на Македонија за членство во НАТО, се осврна и на економската соработка со Алијансата. Во тој контекст во Брисел на нашите партнери во НАТО ќе им ги понудел прехранбените, текстилните потенцијали, а „особено потенцијалите на воената индустрија на Македонија, кои се огромни“.

Иако членството во НАТО го презентираше како апсолутен приоритет на земјава, сепак, тој истакна дека фактичката состојба за членството на Македонија не е многу поволна. Негово лично чувство е дека поканата ни е на дофат и оти НАТО ќе сфати какви се состојбите на терен и ќе го смени ставот кон нашата земја.

На експозето на Треневски забелешки имаше членот на Комисијата, Павле Трајанов. Според него, не треба да бидеме оптимисти дека спорот за името може да се надмине со други ставови на влијателните членки и оти тоа прашање може да се реши без компромис т.е. со промена на принципот на консензус и на солидарност во НАТО.

Игор Ивановски од СДСМ најостро ја нападна „визијата“ на Треневски, нарекувајќи ја агресивна и конфронтирачка, која ја отсликува внатрешната политика на власта, па е и порадикална. Според Ивановски, амбасадор со ваква платформа, во која бара редефинирање на принципите на НАТО, искажува спротивставување кон политиката и стандардите на Алијансата, каде што ние сами сакаме да станеме членка и, пред се', укажува дека оваа организација е во криза и врши агресија врз нашата земја, уште повеќе ќе ги влоши и така разнишаните позициите на земјата во Алијансата. Ивановски, повикувајќи го господ напомош со ваков амбасадор во НАТО, му порача на Треневски дека ако вака има намера да биде амбасадор, подобро и да не оди.

Пратениците од ВМРО-ДПМНЕ во своите обраќања ја бранеа биографијата на Треневски како дипломат. Христина Рунчева во тој контекст рече дека тој е „извонреден политичар, кој го испраќаме во НАТО“. Влатко Ѓорчев преку одбраната на политиката на Владата кон Грција и со напад врз грчката политика ја бранеше тезата на Треневски како иден амбасадор во НАТО. (T.Г.)