Поглед

Потценување за Скопје

Деспина Траjковска

Недолично, дури мизерно и потценувачки. Само вака може да се протолкува односот на Општина Центар кон своите жители ако се имаат предвид условите во кои ја организираше јавната презентација за урбанистичкиот лик на срцето на Скопје. Правлива просторија од само осум квадратни метри со едвај неколку функционални столчиња ни оддалеку не прилегаат за настан што би требало да се најавува подолг период и организира на ниво на претстава.

Згора на се', голем е пропустот што Општината ја организираше презентацијата токму во екот на летните одмори. Скопје е полупразно, па оттаму неговите жители немаат можност да се запознаат со урбанистичките визии за центарот, а уште помалку да остават своја забелешка или препорака. Така, јавната презентација како да помина тајно.

Сево ова уште толку ги подгреа сомнежите оти станува збор за чисто формална процедура. Факт е дека општинарите постапија согласно со законот, организираа презентација за чие одржување ја информираа јавноста, но, од друга страна, воопшто како да не сакаа да им излезат во пресрет на оние за кои треба да работат. Во случајов, го потценија граѓанинот, а истовремено и Градот Скопје. Наместо да обезбедеа соодветен простор во очекување на оправданиот интерес на јавноста, Општината го направи спротивното. Од старт постави рампа оти само најуопрните можеа да истраат во условите на презентацијата. И не само тоа. Планерите од кои оправдано се очекува да имаат одговори на сите прашања, за подетални одговори ја посочуваа адресата на Општината (или Владата).

Се потврдија сомнежите оти поправниот испит за „Мал ринг“ нема ништо да смени. Општината и Владата ќе ги реализираат своите идеи независно од потребите и од желбите на граѓаните за кои треба да работат додека истовремено од нив и живеат.