Јанкулоска во говорнички занес

Министерката на седницата за пратенички прашања имаше четириесетминутна беседа за трговија со дрога

Оливера Војновска

Министерката за внатрешни работи, Гордана Јакулоска, вчера во Собранието имаше генерална проба пред денешната седница на која парламентот треба да расправа за нејзината интерпелација. На заседанието посветено на пратенички прашања, Јанкулоска беше во говорнички занес. Седната во вториот ред од партерот резервиран за Владата, таа имаше четириесетминутна беседа за битката со трговија со дрога. Одговарајќи на прашањето на пратеникот од СДСМ, Менде Диневски, министерката на долго и нашироко раскажуваше за неселективниот пристап и цврстата решеност за справување со ова зло.

Диневски, всушност, прашањето за „политички монтираниот процес за млекарот Душко Илиевски“ му го упати на премиерот Никола Груевски, кој пак, великодушно и' го препушти на Јанкулоска. А таа, неуморно говореше и говореше... Министрите се потсмевнуваа и се вртеа кон галеријата за да ја видат реакцијата на новинарите. Неколкумина опозиционери (Диневски, Цветанка Иванова, Весна Бендевска, Стојан Андов и Соња Мираковска) колку што беа во салата да го слушаат одговорот на прашањето на нивниот колега, почнаа да негодуваат. Некаде во 20. минута од монологот, спикерот Трајко Вељаноски се обиде да ја прекине министерката, давајќи и' со рацете знак да скрати . Но, безуспешно, таа воопшто не го регистрираше. Либералот Стојан Андов почна да се врти во седиштето, чекајќи да дојде неговиот ред за да постави прашање. Ситуацијата стана и комична. Во еден момент Вељаноски иронично ја замоли Јанкулоска да резимира во една реченица. Меѓутоа, Јанкулоска не можеше да се доискаже, па и' требаа уште пет минути за конечно да заврши и да каже дека „нема индиции за малтретирање и тортура на Илиевски“.

Министерката на крајот му упати и директна закана на пратеникот Диневски: „Клевeтата е кривично дело за кое се одговара“. Сепак, тоа помина незабележано во полупразните опозициски редови. Партиските колеги на Диневски, кои влегоа во салата на крајот од долгометражната дискусија, протестираа кај спикерот само за должината на одговорот на министерката. Тој ,пак, се извлекуваше на Деловникот, каде штоп нема ограничување на настапите на министрите.

Премиерот Груевски не го слушаше маратонскиот говор на министерката. Во тоа време беше во холот пред собраниската сала и и' даваше некакви инструкции на шефицата на пратеничката група на ВМРО-ДПМНЕ, Силвана Бонева.

Претходно Груевски одговараше на прашањата на пратеничката од СДСМ, Весна Бендевска, која обвини за селективна борба со кримина��от. Посочувајќи го случајот на 12 високи раководители од РЕК „Битола“, кои се обвинети за криминал од 7 милиони евра од првата половина на 2008 година, таа го праша Груевски зошто нема обвинение и за актуелниот министер за одбрана, Зоран Коњановски, кој тогаш бил генерален директор на РЕК и дали се обидува да го амнестира од кривична одговорност. Бендевска уште праша зошто обвинетите за РЕК се' уште се на работните места, а не во притвор, како што експресно беше ставен млекарот Душко Илиевски.

Во нејзиниот настап премиерот препозна чиста инсинуација својствена за СДСМ. „Ако за некого постои каков било доказ дека го прекршил законот, независно кој е, што е, на која функција, од која партија, етничка, верска, партиска припадност, кај нас нема разлика. Ова прашање можам да го разберам само од аспект на вашето постапување и вашата матрица на размислување“, одговори Груевски. Притоа додаде дека за тоа „кој оди во притвор, а кој не оди, е одлука на судот“.