Владата ќе ги исполнела препораките од ЕК

„За најголем дел од препораките што беа дадени во минатогодишниот извештај на Европската комисија за Македонија се преземени чекори за нивна елиминација“, изјави вчера вицепремиерот за европски прашања, Васко Наумовски. На церемонијата за доделување на владините стипендиите за постдипломски студии од областа на европското право, економија и политика, на неколку евро��ски универзитети, тој рече дека Владата ќе вложи максимални напори и оваа година земјата да добие позитивен извештај од Комисијата. Меѓу областите што треба да се подобрат до ноември, кога ќе биде објавен извештајот, е и политичкиот дијалог, за што, според Наумовски, е потребно повеќе од една страна. Тврдењата на некои европски аналитичари дека европската перспектива на Балканот е само на хартија, Наумовски ги отфрли како неточни, наведувајќи дека европската иднина на регионот постојано се потврдува од страна на ЕУ.

Наумовски вчера во име на Владата врачи седум стипендии за претстојната учебна година. Стипендистите, по завршувањето на студиите во странство, обврзани се да работата неколку години во државната администрација. Стипендиите кои преку Секретаријатот за европски прашања се доделуваат осма година едноподруго од оваа година го носат името на починатата поранешна вицепремиерка за европски прашања, Габриела Конеска - Трајковска. Како што информираше Наумовски, стипендиите се доделуваат со цел да се добијат стручни кадри кои со своето стекнато знаење во странство ќе ја зголемат професионалноста и ефикасноста на македонската администрација. Интересно е што една од стипендиите годинава е наменета за постдипломски студии по европско воздухопловно и космичко право.

Постдипломски студии во странство стипендирани од Владата досега завршиле 67 лица. Неколкумина од нив, по одработувањето на пропишаниот број години во администрацијата, отишле на други работни места, а само еден или двајца не се вработиле во администрацијата и ги вратиле средствата дадени за нивните постдипломски. Годинава, слично како и претходните, Владата издвои седум милиони денари за стипендиите.