Грозоморни убиства „за чест“ ја згрозија Канада

Четири женски членови на имигрантско семејство беа задавени поради слободно облекување и нанесен срам на семејството

ТОРОНТО – Канадски суд прогласи за виновни двајца родители, авганистански имигранти, и нивниот најстар син за убиство на четири женски членови на семејството во т.н. убиство за чест. Тоа е кулминација на случајот што ја стаписа Канада и предизвика широка дебата за судирот на културите меѓу големото имигрантско население.

Мохамед Шафија, неговата сопруга Туба Мохамед Јахја и најстариот син Хамед се прогласени за виновни за убиството на трите ќерки тинејџерки на Шафија и првата сопруга на Шафија, во детално организирана, иако крајно заплеткана, сообраќајна несреќа во јуни 2009 година. Одбраната тврдеше дека четирите загинале кога возењето доцна во ноќта тргнало во погрешна насока.

Четиримесечното судење отвори релативно ретка можност да се зборува за убиство за чест во Северна Америка. Злосторството, во кое жртвите се убиваат поради нанесување срам на нивното семејство, се се' почести во западните европски земји како Велика Британија и Шведска, каде што има бројна имиграција од земјите каде што истражувачите велат дека најмногу се случува тој обичај – Пакистан, Индија и Турција.

Иако Канада и САД се' повеќе прифаќаат се' поголем број имигранти од истите места, значајни судски случаи за убиство за чест се' уште се невообичаени. Грозоморниот карактер на случајот „Шафија“ ги шокираше Канаѓаните, горди на нивните релативно отворени граници и угледот на земјата за интегрирање на имигрантите.

Во Канада, од 1954 година има само 15 обвинети во врска со злосторства за чест, при што сите освен три се извршени по 1999 година. Според владините статистички податоци, во 1970-тите години, најголемиот извор на имиграцијата во Канада, или 36 отсто, била Европа. До 2006 година, еден од двајца нови имигранти потекнувал од Азија, а Европа опфаќала 16 отсто од новодојденците. Други академици тврдат дека насилството против жените постои во сите заедници, но кога го извршуваат некои етнички групи тоа се нарекува злосторство за чест.

Обвинителството тврдеше дека честа вкоренета во авганистанските племенски традиции го натерала Шафија да го исчисти срамот што го почувствувал од однесувањето на непослушните ќерки, Зајнаб (19), Сахар (17) и Гети (13). Двете постари ќерки имале момчиња кои не биле прифатени, а сите три не го слушале таткото со нивното независно однесување и носењето облека која разоткривала. Рона Амир Мохамед, која била прва сопруга на Шафија во полигамното семејство, била убиена, тврди обвинителството, бидејќи била проблематична прва сопруга и попустлива маќеа.

Судскиот процес го наполни канадскиот печат со ужасни детали од убиството во кое полицијата верува дека жртвите биле удавени, а потоа сместени во автомобил што бил турнат во брана во близина на Кингстон, кај Торонто. Локалниот печат испечати полициски транскрипти во кои Шафија ги нарекува неговите ќерки „курви“ и како се фали „ништо не ми е подраго отколку мојата чест“. (Волстрит џорнал)