Насловна

Авиосообраќај

Со „Виз Ер“ до Венеција за 26 евра

29.06.2011, 13:45

Нискобуџетната компанија „Виз-ер“ од 20 септември ќе лета од Скопје до Венеција за цена од 25,99 евра во еден правец.

Раководството на компанијата на денешната прес конференција појасни дека летовите ќе бидат до аеродромот Ревизо, а во цената се вклучени и аеродромските такси.

Оваа компанија од 19 јуни почна да лета кон Лондон за цена од 35 евра, а досега за таа релација место букирале 8.250 граѓани.

Од компанијата изразија очекување, дека до крајот на годината најмалку 25.000 лица ќе букираат за лет кон Лондон или Венеција.

Картите за лет со нискобуџетните компании се купуваат исклучиво преку интернет, а до поевтина цена се доаѓа, доколку резервацијата се направи многу порано пред летот.

Засега остануваат на овие две дестинации, но од менаџерскиот тим на авиокомпанијата посочуваат дека се разгледуваат и други можни дестинации, но оти прво мора да се видат резултатите од оваа почетна фаза.

„Оваа фаза е многу важна за да видиме како ќе се одвиваат работите со овие две дестинации. Постојат многу нови идеи и разгледуваме многу опции, но најнапред мора да видиме дека понудата функционира. Внимателно ќе извршиме евалуација на можните нови дестинации. Имаме список со можни дестинации, но мора пред се да се земе предвид побарувачката и трошокот за нашето оперирање“, истакна генералниот комерцијален директор на „Виз Ер“ Георги Абран.

Според директорот на Агенцијата за цивилно воздухопловство Дејан Мојсовски, влезот на „Виз Ер“ на македонскиот пазар е доказ дека потенцијалот на воздушниот транспорт во Македонија е добар и оти има нагорен тренд за што говорат и статистичките податоци за зголемување на бројот на патници за над 20 отсто во изминатите месеци.

„Како Агенција за цивилно воздухоловство ги поддржавме сите активности во насока на развојот на воздушниот сообраќај и направивме напори за регулаторните и административните промени со цел да се овозможи што повеќе авиокомпании да оперираат на повеќе дестинации. Доказ за тоа е зголемениот број на авиокомпании кои ќе оперираат ова лето“, рече Мојсовски.

Од менаџерскиот тим на ТАВ Македонија најавуваат нови летови за претстојната летна сезона. Така од јули ќе оперираат Air Belin до Цирих, XL Airport кој ќе лета еднаш неделно од Дизелдфорд, италијанската Ber Air четири пати неделно од Анкона и Венеција, а од средината на август турската Пегасус трипати неделно од Истанбул и двапати неделно од Измир.

Првиот човек на ТАВ аеродромите Мурат Орникол најави и завршување на реконструкцијата на скопскиот аеродром пред планираниот рок, односно до 8 септември - Денот на независноста на Македонија. Според концесискиот договор, реконструкцијата на скопскиот аеродром требаше да заврши до 21 октомври.

„Виз Ер“ е основана пред седум години, во 2004 година. Ја покрива речиси целата Европа со евтини летови. Оперира на воздушниот простор во осум држави меѓу кои Унгарија, Бугарија, Украина и Чешка, а најприсутни се во Полска и Романија. Од годинава почнале со работа и во Србија и Балтичките држави. Авиокартите се купуваат исклучиво преку интернет. Минатата година имале 10 милиони патници, а за годинава очекуваат околу 11.000 патници. Располагаат со 37 воздухоплови „ербас 320“ со 180 седишта, а бројот на вработените е 1.450.