Насловна

Ламбринидис не му одговори на Милошоски

Шефот на македонската дипломатија во дилема дали ќе се види со грчкиот колега

Тамара Грнчароска



Новиот грчки министер за надворешни работи, Ставрос Ламбринидис, не му одговорил на нашиот шеф на дипломатијата дали утре ќе има средба во Будва. Од грчкото МНР информираат дека немаат договорено средба и дека за се' ќе се решава на самото место. И од македонското МНР ја даваат истата информација „најверојатно утре ќе се договара средбата“ иако поканата до Ламбринидис е испратена уште пред десетина дена. „Ние се' уште чекаме одговор од грчката делегација. Досега не одговориле дали нивниот министер има време и расположение за средба“, информираат од нашето МНР.

Милошоски и Ламбринидис се наоѓаат во Црна Гора на состанок на шефови на дипломатии на земјите од Процесот за соработка на Југоисточна Европа. Доколку се сретнат, тоа ќе им биде втора средба за десет дена. Првата се случи само три дена по именувањето на Ламбринидис за министер, на состанокот ЕУ - Западен Балкан на 20 јуни во Луксембург. Средбата во Луксембург била многу кратка, толку колку Милошоски да му го честита новиот мандат и да му посака успешна работа.

Меѓу двете средби на министрите во Брисел се видоа и премиерите на Македонија и на Грција, Никола Груевски и Јоргос Папандреу. Зачестените неофицијални билатерални средби меѓу двете страни и тоа на високо ниво, ја подгреаја можноста за рестартирање на замрениот процес на преговори за името.

Но, досега ниедна од овие средби не резултира со конкретни чекори или придвижување на процесот и се сведуваат само на штури соопштенија и изјави за заложбите на двете страни за што поскоро решавање на спорот. Тоа се повтори и по последната средба Груевски - Папандреу од која до јавноста единствено стигна информацијата оти двајцата премиери изразиле подготвеност за изнаоѓање решение околу прашањето за името, кое би се остварило низ дијалог и динамичен процес под покровителство на ОН.

Инаку Милошоски во Црна Гора учествува на регионалниот форум на кој ќе бидат разменети мислења за натамошно промовирање на европските перспективи на регионот, со посебен фокус на соработката.

Во рамките на црногорското претседавање со Процесот за соработка на Југоисточна Европа ќе се одржи и Самит на претседатели на држави и влади од регионот на кој ќе присуствува и македонскиот претседател, Ѓорге Иванов.

Во Будва состанок на Јадранската повелба

Министерот за надворешни работи, Антонио Милошоски, денеска во Будва ќе учествува и на состанокот на Партнерската комисија на земјите од Јадранската повелба. На состанокот на кој ќе учествува и генералниот секретар на НАТО, Андерс фог Расмусен, најавено е дека ќе се разговара за прашања поврзани со евроатлантската интеграција на регионот и заедничкиот придонес во операциите на Алијансата во Авганистан, како и да ги договорат идните активности во рамките на овој форум. (Н.Р.)