Насловна

Поглед

Иронија и сарказам

Горан Адамовски

Иронијата е јазичен израз и фигура во која вистинското значење на зборовите е или прикриено или спротивно од буквалното значење на изразот. Иронијата е форма на црн хумор.

Ова е „научното“ толкување на иронијата. На терен и во практика тоа би изгледало приближно вака: полициски специјалец до смрт претепува момче од 22 години во центарот на Скопје и пред повеќе очевидци, кои не дозволуваат забошотување на случајот. Младите се собираат на секојдневни протести, се бара одговорност од сите инволвирани, се вжештува атмосферата во земјата.

Точно три недели подоцна, Министерството за внатрешни работи ги поканува медиумите да присуствуваат на показна вежба на „алфите“, во кои пред полицискиот врв, на чело со министерката Јанкулоска, ќе демонстрираат како работат на терен. Дваесетминутното сценарио мина во одлична глума на полицајците. Културни, одмерени, ненасилни, ти доаѓа да ти е мерак да те запрат на улица. Вежбите им биле една третина од времето, а ако посакале, слободно можеле да добијат и екстра време за тренинг.

И така истренирани, излегуваат на улица. Не е точно дека се агресивни, невоспитани, дека забораваат и да се легитимираат. Па вчера видовме со свои очи како работат на терен. Ама, убаво вика и Јанкулоска, дека одредени ситуации не можат да се предвидат, ама битно е полицајците да имаат капацитет да проценат ситуација и да реагираат соодветно. Боже мој, ако треба со боксови и со удирање од земја на невини деца - тогаш така.

Од иронијата, посилни се сарказамот и гротеската. Но, имаме семејство завиено во црно на кое не му е до смеа.