Реплики

Најсилната грчка амбасадорка

Соња Крамарска

Македонската дипломатија треба сериозно да го има предвид факторот Хафингтон на меѓународната сцена

Дипломатијата не се одвива секогаш по официјални канали, туку напротив, некогаш нејзините успешни формули се темелат на неконвенционални методи. Македонскиот политички врв, кој води „војна“ со Грција, малку знае за најмоќниот во моментов грчки амбасадор. Или подобро речено амбасадорка: Ариана Хафингтон-грчка американка, газдарица на Хафингтон Пост, во американските кругови познат и како гласило на Демократите. Нема прием или свечена вечера без неа. Каде е светската политичка и бизнис елита, таму е и таа. Нема настан од шоу бизнисот, а Ариана Хафингтон да не се врти таму.

Хафингтон (поранешно презиме Стасинопулос), бивша сопруга на поранешниот републикански конгресмен Мајкл Хафингтон, е Гркинка од глава до петици.Во ланскиот судски спор со неколку колумнисти од Хафингтон Пост, кои и бараат милионски суми да им плати за нивните колумни обвинувајќи ја дека им ја украла и профитирала од идејата за најпознатиот електронски весник, таа луцидно одговори: „Тие мислат дека со притисок ќе ми земат пари. Забораваат дека јас сум Гркинка“. Форбс ја стави на 12-тото место на листата на највлијателни жени во медиумите.

Дека е таа грчки глас на светската сцена покажа и последниот пример со Светскиот економски форум во Давос. Хафингтон побара во иднина тој форум да се одржува во нејзината татковина. На прашањето зошто бара Давос да се пресели во Грција кога швајцарското туристичко место го има потребниот сјај и гламур да ја угости светската елита, таа одговори: „Да, Давос има милијардери, но таму не можете да видите ниту една јахта“. Изјавата со денови се вртеше на Твитер и Фејсбук. Ариана направи успешен спој на неконвенционална дипломатија и женски шарм. Таа знае дека еден Давос може да ја врати Грција во игра побргу од било кој светски кредитор.

За разлика од Руперт Мардок кој мораше да инсталира телевизии и весници ширум светот за да биде признаен за цар во медиумскиот бизнис, Ариана Хафингтон расне во глобален бренд само со нејзиниот блог-весник-агрегатор The Huffington Post и негов��те ограноци во сите поголеми американски центри, и Канада, Велика Британија и Франција. Популарноста на адресата www.huffingtonpost.com се шири со светлосна брзина меѓу оние кои ги носат одлуките во САД.Тајната на Хафингтон Пост не е во широкиот таргет на публика, туку во прецизно таргетирање на оние кои ги носат најкрупните одлуки во Вашингтон и Њујорк. Погодувате, ниту еден прием или вечера во Белата Куќа не може да се одржи без присуството на Ариана Хафингтон.

Хафингтон е во редовен контакт со грчките премиери. Ако до пред шест години нејзиното име не значеше ништо во Атина, сега на шестгодишнината од Хафингтон Пост, таа е главната врска на грчките влади со светот. И посебно со САД. Минатата година, кога Ариана Хафингтон ја посети нејзината родна Атина, грчките медиуми известуваа за нејзината средба со премиерот Папандреу, како да се работи за највисок гостин од американската влада.

Што ќе прави Ариана Хафингтон ако нејзините омилени Демократи паднат од власт на изборите во ноември - прашуваат нејзините опоненти во САД. Па нема да биде крај на светот, можеби ќе престанат да доаѓаат покани од Белата Куќа, но ќе почнат да доаѓаат од Елисејската палата. Хафингтон го прошири своето царство во Европа, мудро поставувајќи ја Ан Винклер, сопругата на Доминик Строс Кан, за главна уредничка на француската филијала на Хафингтон Пост. Семејството Кан, кое е бренд меѓу француските социјалисти кои се на чекор до освојување на власта во Франција, во моментов ги ужива плодовите на политичка жртва на режиран скандал против екс шефот на Меѓународниот монетарен фонд. Преку таа врска Ариана Хафингтон ја зацврстува својата позиција во Франција.Тоа може да се покаже како корисно во случај да потрае неизвесноста околу Грција и во случај да се појави потреба Атина да си ги пребројува сојузниците.

Кога ќе ја погледнете Ариана Хафингтон, ќе видите дека таа неодоливо потсетува на Дора Бакојани. Но Ариана Хафингтон го нема политичкото педигре на Бакојани. Но не е мала работа ни да напишеш биографија на Марија Калас и на Пабло Пикасо, или на пример да бидеш еден од најгласните поддржувачи (во деведесеттите) на конзервативните каузи како онаа на денешниот претседателски кандидат Њут Гингрич тогаш наречена „Републиканска револуција“. Или еден од најогнените поддржувачи на кандидатурата на Боб Дол за претседател во 1996. А дека станува збор за Гркинка, американците можеа да видат кога се спротивстави на нивната воена интервенција за време на југословенската криза.

Македонската дипломатија треба сериозно да го има во предвид факторот Хафингтон на меѓународната сцена. Газдарицата на Хафингтон Пост ( кој лани успешно е продаден на Американ онлин (aol) но сопственичката го задржа кормилото и моќта) можеби не ја интересираат деталите околу спорот со името, но сосема сигурно беспрекорно ќе ја заврши задачата за лобирање што ќе и ја зададе грчката влада.Таквиот тип на лобирања секогаш се одвиваат зад камерите и далеку од очите на јавноста, а македонската страна нема да има ни право на реплика или на протестна нота.

Додека Скопје го набљудува Адамантиос Василакис и шефот на дипломатијата Димас, Ариана Хафингтон ги јакне позициите на Грција на меѓународната сцена. Несомнено, таа е неформален амбасадор од голем калибар кој може да се покаже од голема корист за Грција погледнато од агол на политичките несогласувања меѓу нашата земја и јужниот сосед.