Поглед

Бајки за ЕУ

Слободанка Јовановска

„Ова е пенкало од времето кога добивме кандидатски статус. Тоа веќе не пишува, се потроши одамна, а ние се' уште расправаме за истата тема, кога ќе добиеме преговори со Унијата“. Вака вчера Радмила Шеќеринска ја објасни состојбата на духот на нацијата, по милион исцрпувачки дебати за евроинтеграцијата, која стои на иста точка пет години по давањето кандидатски статус на Македонија. Побајата тема од оваа моментно е само спорот околу името на државата, па отворањето на овие прашања почнува да губи смисла, колку и да сакаме да станеме членки на НАТО и на Европската унија.

Впечатокот порано беше дека колку повеќе зборуваме за неа, толку помалку работиме на реформите, односно дека со реторика ги супституираме промените. Сега зборуваме за да не заборавиме дека сакаме прием во Унијата и во НАТО и за да ги увериме тие во ЕУ, бидејќи сериозно почнаа да се сомневаат во намерите во Македонија.Парадок��от е дека Македонија на некој начин влегува во Унијата, а во државава никој не го официјализира тоа. Македонските граѓани наголемо бараат и добиваат секакви можни европски пасоши, децата ги праќаат на студии во европските земји, купуваат таму имоти, имигрираат за подобри услови за работа и живот или бараат масовно азил. Некои од нив почнаа и да се бранат од сопствената држава барајќи заштита од некоја друга во Унијата, а тоа никого не вознемирува и натаму во Македонија. Евроинтеграцијата петнаесет години беше најдобро продаваната политичка тема кај нас, но очигледно последнава година на граѓаните повеќе им личи на бајка отколку на реалност. Потврда за тоа е последната анкета во која 78 отсто од граѓаните сакаат во ЕУ, но повеќе од половината од нив не веруваат дека има лидер кој може да ги одведе таму.