Убиството не е во интерес на Албанците

Арбен Џафери вели дека Албанците немаат интерес од таков страшен акт како што беше убиството кај Смилковци

Арбен Џафери, почесен претседател на опозициската ДПА, анализирајќи го петкратното убиство кај Смилковци, оцени дека Албанците се единствените што немаат никаков интерес од еден таков страшен акт.

„Ако ги анализираме последиците од овие настани, јасно произлегува дека ова ладнокрвно убиство не е во интерес на Албанците, туку дека пред се' е во интерес на оние што не можат да почекаат ниту една секунда по овој трагичен настан за спектакуларно и омаловажувачко апсење на сомнителни граѓани во Прешево и во Скопје. Апсењата на српска територија се директно поврзани со настаните во Македонија“, вели Џафери, во интервју за бугарската агенција „Фокус“.

Според Џафери, албанската политика отсекогаш била и секогаш ќе биде прозападна и затоа, вели, не случајно беше покрената и оваа стратегија за поврзување на политиката на Албанците со исламскиот фундаментализам и радикализам.

Коментирајќи го пробивот на радикалите на грчката политичка сцена, Џафери вели дека во Западна Европа „Златна зора“ се разви на основите на анахроните верувања и вредности. Грција, вели тој, веќе долго време има проблем со сопствената верзија на историјата, на правната држава и обврската на граѓанинот да плаќа данок. „Национализмот секогаш ќе има негативно влијание, ако нема основа и ако не го вклучува критериумот на владеење на правото и на образовните вредности“, појаснува Џафери.

Тој натаму додава дека политиката на фундаменталистите, која се идентификува со исламот, нема успех, особено не во земји што ги следат демократските стандарди и вредности, така што не гледа логична можност исламскиот фундаментализам да влезе во Европа.

На прашањето дали е се' уште жива идејата за голема Албанија, Џафери одговара: „Албанската кауза за овие територии почна по распадот на Југославија и тоа не како резултат на интервенцијата на меѓународните фактори. Правото на самоопределување е легитимно отворено по распадот на државата Југославија“.

Според Џафери, државите опстануваат ако има внатрешна кохезија меѓу граѓаните, кои покажуваат голема лојалност кон државата. Неуспехот на мултиетничките држави, според него, директно е поврзан со нелојалноста кон државата.

Запрашан дали геополитичкиот јазол на Балканот е веќе уморен, Џафери одговара: „Се' уште треба да видиме дали овој јазол ќе се реши со сабја или со договор. Ако проектот ЕУ успее да ги реши овие антагонизми, политичкото решение ќе дојде до израз наспроти другите опции“.