Зошто Владата се занимава со падот на „кингерот“ на Трајковски?

Maглата од Мостар се' уште виси над Македонија. Извештајот, на кој посебен тим работел повеќе од три и пол години, веќе влезе во владина процедура

Гордана Дувњак

Ќе има ли доволно докази во новиот извештај за паѓањето на владиниот „кингер“ во кој загина поранешниот претседател на државата, Борис Трајковски, за да може седум години по трагедијата во Мостар, Обвинителството да отвори истрага?

Во изминатите години, тимот на државниот јавен обвинител, Љупчо Шврговски, а пред тоа и на неговиот претходник Александар Прчевски, застана на ставот дека нема елементи за отворање истрага. Одговорноста за уривањето на авионот, во кој загина претседателот и деветмина членови на неговиот кабинет и на екипажот, беше лоцирана во двајцата пилоти, што се темелеше на извештајот и на транскриптот од црната кутија добиен од босанското обвинителство. Во јавноста, пак, сите овие години се плетат најразлични теории на заговор, кои прават случајот да биде обвиткан со превез на мистерија.

Од Владата потврдуваат дека извештајот што го изготви посебна работна група е веќе завршен и се наоѓа во владина процедура. По завчерашната информација, пласирана преку државната агенција МИА, владиниот портпарол Мартин Мартиноски вели дека не може со прецизност да каже кога ќе биде разгледан извештајот, не исклучувајќи ја можноста тоа да се случи и на вчерашната седница.

Чудно е што извештајот ќе се разгледува на владини комисии, што ја отвора дилемата околу легитимноста едно политичко тело да разгледува стручна експертиза, како и прашањето зошто извештајот не е испратен директно во Обвинителството. Извори од истрагата негираат дека е прекршена процедурата, потенцирајќи дека тие се должни да го достават извештајот до оној што ги ангажирал.

Тие сметаат дека извештајот содржи доволно докази за да може прв пат да биде отворена истрага, што не е направено досега, како што тврдат, ниту од страна на босанското обвинителството ниту, пак, од домашните надлежни органи.

Со содржината на извештајот, работен повеќе од три и пол години од обемен тим домашни експерти, кои биле во тесна соработка со меѓународни истражители од Советот на Европа, не е запознат ни државниот јавен обвинител Љупчо Шврговски. Сепак, тој тврди дека во оној момент кога ќе го добијат извештајот, ќе проценат дали новите докази се доволни за отворање истрага.

Индикативно е што извештајот влегува во владина процедура само неколку дена пред годишнината од овој трагичен настан - 26 февруари, која се одбележува оваа недела. А, само ден пред тоа, во емисијата „Код“ на Канал 5 беше емитувана посебна емисија посветена на мистеријата околу паѓањето на „кингерот“.

Новинарите од „Код“ се повикаа на извештајот од македонската воздухопловна комисија, која наводно доставила официјално барање до властите со препорака да отворат нова истрага за смртта на претседателот Трајковски и неговите сопатници. Најголемите дилеми се однесуваат на моментот на реконструкција, односно како таа воопшто можела да биде направена кога инструментите биле неисправни. Беше посочено дека податоци за висината, брзината на авионот и растојанието од пистата не можеле да се земат ниту од аеродромот во Мостар, затоа што таму немало надгледен радар.

Сомнежи постојат и околу начинот на кој е направена потрагата по паднатиот авион, бидејќи цел ден немало сигнал од уредот ИЛТ, кој требало да ја покаже локацијата на падот. Според извештајот на босанската комисија, уредот ИЛТ имал проблеми со напојување со струја поради неповрзани батерии. Но, оштетениот инструмент утредента на чуден начин оживеал и дал сигнал, по што биле најдени „кингерот“ и жртвите.

Дополнителна забуна околу целиот овој случај внесе и министерката за внатрешни работи, Гордана Јанкулоска, која неодамна за време на расправата за нејзината интерпелација, јасно алудираше дека „во времето на СДСМ имало два атентата“ - едниот на првиот претседател Киро Глигоров, а другиот на претседателот Борис Трајковски.

Еден од бранителите на семејствата на починатите, скопскиот адвокат Игнат Панчевски, вчера излезе со шокантни тврдења дека претседателот Борис Трајковски и сите сопатници во „кингерот“ што се урна во 2004 година кај Мостар се брутално убиени, а доказите за атентатот се наоѓаат во Скопје.

Тој во изјава за интернет-порталот Мкд.мк вели дека лично ги видел доказите за атентаторот, а дел од нив и самиот поседува.

Панчевски тврди дека поседува докази оти патниците што загинаа на 26 февруари 2004 година биле ��иви по падот на претседателскиот авион.

„Сите до еден биле повредени, но живи. Поседувам доказ дека еден од повредените повеќе од половина час разговарал на мобилен телефон со семејството. Му биле скршени двете нозе, но разговарал со семејството. Има докази и аудио и видеозапис, како е извршен атентатот. Постои сателитска видеоснимка. Тој е соборен од воен авион. Потоа на снимките се гледа како на местото на настанот доаѓаат мобилни воени екипи. Преживеаните биле убиени, а потоа телата префрлени и запалени со напалм“, вели адвокатот Панчевски.

Извори на „Утрински весник“ од истражниот тим што го изготви најновиот извештај потврдуваат дека навистина постојат такви докази. Но, нагласуваат дека споменатиот адвокат своевремено ја одбил понудата за заедничка истрага. Се надеваат дека Обвинителството ќе ја искористи својата законска надлежност и ќе ги побара на увид и доказите што ги поседуваат семејствата на починатите.