Трајко Вељаноски со свита од 30 луѓе во Австралија

Собраниска делегација од триесетмина на чело со шефот на парламентот пакува куфери за далечниот континент

Претседателот на Собранието Трајко Велјановски со делегација од речиси триесетина парламентарци и членови на неговиот кабинет, од викендов, па наредните пет дена ќе престојуваат во Австралија. Тој и делегацијата ќе бидат гости на тамошниот парламент и притоа ќе остварат амбициозна агенда на средби и активности - од Канбера, Сиднеј до Мелбурн. Во делегацијата се наоѓаат претставници на сите главни политички партии, па во трошењето на државните пари ќе бидат сите еднакво одговорни.

Делегации од вакви масовни размери имаше и претходно, што предизвика чудење и реакции во иселеничките кругови, со оцена дека прошетките до Австралија, неопходни или не, станаа нормални од Македонија како патување до населбата Ѓорче Петров. Претходно многубројна делегација на најдалечниот континент предводеше и градоначалникот на Аеродром, а пред изборите во кои првпат беше вклучена дијаспората до Австралија отпатуваа и многу актуелни функционери од владејачката ВМРО-ДМПНЕ.

Посетата веќе изиритира некои од иселеничките кругови, но не поради масовноста на делегацијата, туку поради тоа што во неа е вклучен и Џевад Адеми како преставник на ДУИ, кого иселениците го паметат по неговите активности за време на војната во 2001 година. Според Ицо Најдовски, ниту една организација на македонската заедница нема да оствари средба со спикерот и делегацијата бидејќи е вклучен Адеми, кого го сметаат за одговорен за кршењето на најосновните човекови права. (Н.Р.)