Мое ќоше

Додека Нимиц не си заминал

Ерол Ризаов

Гордиевиот јазол меѓу Македонија и Грција може да се одврзе само со меч

Метју Нимиц, медијаторот на ОН, престојува на Балканот, во посредништво за надминување на спорот со името на Република Македонија. Ревносно ја мери температурата во Скопје и во Атина од која зависи што ќе им зготви на Грците и на Македонците.

Во Скопје, вели, е студеникаво, ама снегот се топи. Му се видело на Нимиц дека на Македонците им пропуштаат чевлите кои се премногу салонски за ова време. Во три различни салони се состанал со претседателот на државата, со премиерот и со министерот за надворешни работи и со многу други знајни и незнајни јунаци. Сите некако му цупкале во исто место, како да имаат вода во ушите, а не во чевлите. Нешто многу им застудело кога Нимиц како медијатор им дал до знаење дека баш и не ги сака судските одлуки, па макар биле и на Судот во Хаг, особено ако извршителите се прават удрени и не ги спроведуваат. Во Атина температурата е многу повисока. На точка на вриење среде зима. Ама не поради него, туку поради свилениот гајтан на вратот на Грците. Нимиц во Атина го пречека, по се' изгледа, само министерот за надворешни работи, Димас. Премиерот и претседателот на Грција имаа поважна работа. Тие ги чекаа вестите од Брисел дали ќе го затегаат јазолот на гајтанот или ќе можат да земат здив. Стотици милијарди евра за европското галениче е новата доза која може да ја предозира и Европа, особено ако галеничето си ја почитува својата традиција на вечни неверства и банкротства.

Секоја планина со своја тежина. На Грците уште им гори под нозе оти не можат да си ги вратат зајмовит, ни со најновите позајмувања, а на Македонците им замрзнаа нозете одејќи кон Европа боси по трње. Македонија ја сака Европа, ама таа не ја сака неа. Класична трагедија од невозвратена љубов. Грција не ја сака Европа, ама таа ја сака Елада, мислејќи дека е тоа исто што и Грција. Таа љубов Европа ја чини како св. Петар кајгана.

Нејсе, по големата гозба што ја подготви Европа за грчката софра, Нимиц тешко ќе успее нешто од нога да приготви за Грците. Единствена надеж, сепак, е Грците да останат гладни, бидејќи овој пат ручекот мора да се плати однапред. На вакво нешто Грците не се навикнати. Нимиц нема што да им сервира ниту на Македонците, иако не се толку пребирливи. Конечниот извештај на Нимиц за климата гласи: надворешните температури се подносливи и влеваат надежи, но внатрешните се толку високи што горат се' што е разумно.

Имам еден совет за г. Нимиц. Би било добро да му пренесе на својот шеф Бан Ки-Мун да го прочита внимателно извештајот на колегата Кофи Анан за неговиот проект за разрешување на кипарскиот проблем. Рамно 30 години, од 1974 до 2004 година, Грција го убедуваше светот дека еден дел на независен Кипар е под окупација на Турција. Кипар треба да остане цел и независен како држава на кипарските Грци и Турци - беше главното гесло пред светот. Кога Кофи Анан го понуди ова истото 2004 година со поддршка на Америка. Кога на масата беше поставен предлогот за цел и независен Кипар и кога Турците го прифатија предлогот на референдум, тогаш кипарските Грци изгласаа на свој референдум дека не сакаат заедничка држава со кипарските Турци. Ги фатија живи како 30 години го лажат светот. Кофи Анан не можеше друго да изјави освен дека се' што е разумно на Кипар со овој референдум е уништено. А, Европа одговори со тоа што спокојно го прими Кипар како своја рамноправна членка, се разбира, без турскиот дел.

Затоа надежите на Нимиц за подобра клима на Балканот, со вакви преговарачи, особено со внатрешните циклонски температури немаат шанса. Можеби и можеше нешто да се направи пред неколку години ако се почитуваше Привремената спогодба, која ја гарантира ОН, за непречен прием на Македонија во светските асоцијации под привременото име ПЈРМ. Со тоа ќе се изедначеа преговарачките позиции на Македонија и на Грција. Сега, откако и Македонците, како Грците пред четири века, дознаа дека потекнуваат од античките народи и цивилизации и откако повеќевековната грчка антикоманија инфицирана токму во Европа стаса и во Македонија пред само неколку години, по оваа епидемија, нема никаква надеж за прифатливо решение од двете страни. Овој Гордиев јазол може да се одврзе само со меч. Ама нема кој да пресече.