Тачи во сојуз со Црвенковски

Гојко Ефтоски

ТЕТОВО - Демократската партија на Албанците на Мендух Тачи на претстојните локални избори ќе коалицира со најголемата опозициска партија на Македонците, СДСМ. Тоа е одлука на Централното собрание на ДПА, донесена на вчерашната седница во Тетово.

Луан Треси, претседател на тетовскиот разгранок на ДПА соопшти дека Централното собрание едногласно ја поддржало одлуката за коалиција со СДСМ. Таа одлука, како што рече Треси, произлегува од договорот што го постигнале лидерите на ДПА и на СДСМ, Мендух Тачи и Бранко Црвенковски.

„Двете партии ќе настапуваат со заемна поддршка на кандидатите за претстојните локални избори. Тоа значи дека во општините каде што не ќе може да победи кандидат Македонец, СДСМ ќе го поддржи кандидатот на ДПА. И обратно, во оние средини каде што не може да победи Албанец, ДПА ќе ги повика своите членови и симпатизери да гласаат за кандидатот на СДСМ“, рече Треси.

Црвенковски и Тачи долги години беа жестоки противници, но нивните несогласувања почнаа да спласнуваат по растурањето на коалицијата меѓу ДПА и ВМРО-ДПМНЕ во 2008 година. Според најавите, лидерите на СДСМ и на ДПА треба да се сретнат утре, при што се очекува да се потпише договор за коалициска соработка.

На седницата на Централното собрание на ДПА присуствуваше и почесниот претседател на ДПА, Арбен Џафери. Запрашан како ги коментира изјавите на лидерот на ВМРО-НП, Љупчо Георгиевски, Џафери рече: „Кога немате конкретно решение за грст проблеми со кои се соочува Македонија, сигурно е дека таквите мислења тлеат. Георгиевски е малку поискрен од другите политички лидери. Тој зборува отворено, онака како што се зборува и по сите домови, во сите кругови, со тоа што таквите разговори се неформални. Георгиевски изнесува едно стојалиште кое во Македонија веќе постои“, изјави Џафери.