Мислења

Опозицијата нема да оди на одмор

Гордан Георгиев

Кој медиум и' останува на опозицијата? Улицата. Теренската активност. Од човек на човек. Борба за отрезнување на психозата во која западнавме

ОЧИ ШИРУМ ОТВОРЕНИ

Има ли право опозицијата на одмор? Смее ли да си дозволи воздишка од напорната година? Ако реално и чесно ги согледаме активностите на опозицијата изминатава година, ако направиме отчет, лесно се забележува дека на полето на она што во нормално демократско општество би се нарекло „опозициска борба“, СДСМ и опозицискиот фронт направија добра работа.

По поразот на предвремените парламентарни избори и логичните и очекувани скалила на разочарувања и апатија, денес слободно може да се каже дека билансот на опозицијата е на позитивно салдо. Во изминатиов период СДСМ ги формираше советите на партијата, со намера да вклучиме што повеќе луѓе, експерти во своите области и не нужно членови на партијата. Идејата беше да отвориме дискусија и вентил за нови идеи кои би и' помогнале на опозицијата подобро, пообјективно и покреативно да ги артикулира проблемите во општеството. Практично секоја сабота и недела некој од партиските совети заседава, излегува јавно со став и креира решенија за подобар живот на нашите граѓани. Потоа таквите решенија партијата ги преточува во формални предлози кои се доставуваат до Владата или парламентот.

Пратеничката група на СДСМ никогаш не била поактивна. Не само критикувајќи ги неумесните, често и криминалните предлози на владејачкото мнозинство, туку и преку предлагање закони за подобрување на животот на граѓаните. Само во последниве месеци, пратеничката група на СДСМ предложи повеќе од 30 закони или измени на закони и други пакет мерки за преживување на нашите осиромашени граѓани. Поднесовме повеќе од 500 амандмани кои требаше да ги коригираат погрешните приоритети на власта. Наместо жални врби, ние предлагавме изградба на мостови и патишта, наместо милионски огради на мостови ние предлагавме помош за социјалните случаи и подобрување на здравствените услуги. Најчесто овие мерки беа од областа на економијата и социјалата (намалување на казните за граѓаните, минимална плата, социјална помош на најзагрозените итн.)

Конечно, неодамна пратениците на СДСМ го предложија и уставниот амандман со кој ќе се овозможеше незастарување на криминалните дела од процесот на приватизација.

Собраниските седници никогаш не биле толку политички жешки и никогаш претходно не се чувствувал толку голем диспаритет во дискусиите: пратениците на опозицијата цело време дискутираат и аргументираат, пратениците од власта молчат или навредуваат, и гласаат секогаш против предлозите на опозицијата. И толку. А што очекува власта од парламентарна демократија? Да истураме навреди кон пратениците на владејачкото мнозинство? Да држиме кратки и неаргументирани говори? Да кренеме раце и да не предлагаме ниеден закон бидејќи секако ќе бидеме надгласани? Да гласаме под диктат на Никола Груевски? Не, тоа нема да го направиме, но затоа сите овие добри и конструктивни предлози на опозицијата ќе ги реализираме откако ќе падне оваа власт. Овие добри предлози на опозицијата нема да паднат во вода или во заборав. Ние се обврзуваме овие мерки да ги реализираме во моментот кога СДСМ ќе ја освои власта на следните парламентарни избори.

Да продолжам со отчетот. Претставници на СДСМ буквално секој ден држат по најмалку две до три прес-конференции или даваат изјави за медиумите. Секој ден, на сите теми што ги засегаат граѓаните. На овие изјави и прес-конференции, кои многу често имаат за цел да понудат позитивни решенија за граѓаните или да ги подобрат политиките на власта, не одговара Владата. Овие мерки и решенија се насочени кон Владата, но на нив одговара „Центарот за лаги и манипулации“ на ДПМНЕ и тоа со соопштенија. Ние со живи луѓе, тие со пишани матрици-соопштенија во кои само се навредува и се омаловажува политичкиот противник. Да, можеби огромната доминација на провладини медиуми максимално ги минимизира медиумските активности на опозицијата, но тоа е факт кој во догледно време нема да се промени.

Кој медиум и' останува на опозицијата? Улицата. Теренската активност. Борба човек на човек. Борба за отрезнување на лудилото и психозата во која западнавме сите, под влијание на медиумско-финансиските седативи што оваа авторитарна власт ни ги сервира секое утро и секоја вечер. Борба против „мачнината“ што излег��ва од стомакот на премиерот и како опасна чума се шири кон сите нас.

Затоа, СДСМ од следниот викенд и преку цело лето почнува со протестно-промотивни собири низ цела Македонија. Цел јуни и цел јули ќе ги промовираме нашите кандидати за градоначалници, ќе ги сумираме резултатите од владеењето на Никола Груевски, ќе предлагаме решенија. Паралелно со тоа, ќе продолжиме со промоција на нашите политики, со политиките за „преживување на македонските граѓани“, не надевајќи се веќе дека власта ќе прифати што било од овие добри проекти, туку со единствена цел да им покажеме на нашите граѓани дека алтернативата на оваа власт е подобра, покомпетентна, почесна и поправична. Со еден збор, СДСМ нема да оди на одмор ова лето.

Ете, тоа работиме, драги пријатели. Ако имате некаква поинаква и подобра идеја, повелете, кажете ја. Ние сме тука цело лето, ќе се видиме низ нашите градови и села. Ако не сте отишле на одмор, повелете придружете се на нашите промотивно-протестни активности. Ако, пак, одморате, размислувајте за слободата и стравувајте да не ве поклопи некаков нов „Нов бран“ од недобројната авторитарна ризница на власта. Во септември ќе ве дочекаат заостанатите кредити, децата треба да се праќаат на училиште, трошоци за зимница...глава боли.

Е токму во името на таа солидарност СДСМ нема да оди на одмор ова лето. Шегите што ги прави политичкиот противник дека ќе сме држеле протестни собири на Халкидики, признавам дека се духовити, но ќе паднат во вода. Ќе биде интересно да се видат нафатираните првенци од власта како со скапи коктели на лежалки на плажа (и тоа поретко на Халкидики, најверојатно на Бахами, Сејшели или слично) ќе не' гледаат нас како протестираме и промовираме на плоштадите низ цела Македонија. Септември ќе биде тежок месец, но надежта е најпотребна кога ни е најтешко.

(Авторот е потпретседател на СДСМ)

Наш став



Објавувањето колумни и мислења од надворешни автори е одраз на намерата на „Утрински весник“ да биде влијателен глас на заедницата. Но, напоменуваме дека не се согласуваме секогаш со ставовите што ги изнесуваат нашите колумнисти, особено кога станува збор за лични дисквалификации, етикетирања без основа и извртување на контексти со цел да се наштети на други личности од која било сфера. „Утрински весник“ се оградува од таквиот речник и конотации и ги смета за непримерни во јавната комуникација.