Дождот го прекина машкото финале на „Ролан Гарос“

Надал подобар од Ѓоковиќ во првите два сета со 6:4 и 6:3

Финалето на „Отвореното тениско првенство во Франција“ треба да биде доиграно утре, откако поладнево дождот беше причината финалистите Рафаел Надал (Шпанија) и Новак Ѓоковиќ (Србија) предвреме да го напуштат централниот терен на „Ролан Гарос“.

Шпанскиот тенисер ги доби првите два сета со 6:4 и 6:3. Ѓоковиќ беше убедлив во третиот сет кој го доби со 6:2, а прекинот настана во четвртиот сет при резултат од 2:1 во гемови за Србинот.

Доколку временските услови дозволат натпреварот ќе продолжи утре од 13 часот, но според метеоролошките прогнози и утре во Париз ќе врне дожд, па неизвесно е кога ќе се доигра машкото финале.

Вчера во финалниот меч кај жените Марија Шарапова (Русија) ја победи Сара Ерани (Италија) со 2:0 во сетови (6:3 и 6:2).