Лувр се' уште е светилиште на светската уметност

Испитувањата покажуваат дека луѓето најмногу сакаат да ја видат Мона Лиза и да се фотографираат со неа

Невена Поповска

Најпосетен музеј во светот во 2009 година е парискиот „Лувр“, каде што е изложено ремек-делото на Леонардо да Винчи со најтаинствената насмевка на светот. Со 8,5 милиони посетители, „Лувр“ е на врвот на листата од петнаесет светски музеи. Испитувањата покажуваат дека луѓето најмногу сакаат да ја видат Мона Лиза и да се фотографираат со неа.

Листата, се разбира, говори за ликовниот вкус на денешницата, и тоа во корист на класиката во однос на модерната уметност. Лондонскиот „Тејт модерен музеј“ е поместен на петаесеттото место со 4,7 посетители, а прв музеј со предзнакот модерен во својот назив е Њујоршкиот музеј на модерна уметност - МОМА, со 2,6 милиони посетители, кој е поместен на 11 место.

Во Лувр се чуваат 35 илјади експонати, но ниту еден досега не ја надминал Мона Лиаз која се чува со двојно стакло и ограда. Закачена е на средината на салата, а куриозитет е тоа што многумина од посетителите воопшти и не ја погледнуваат подетално кога ќе и се приближат. Важно им е само да ја фотографираат.

Петроградскиот „Ермитаж“ е дури на 13 место со 2,4 посетители, а пред него се тајванскиот „Palace museum“ , Корејскиот национален музеј и мадридскиот „Museo Nacional del Prado“.

Огромна е разликата на посетители меѓу првиот и вториот најпосетен музеј во светот. Втор на листата на најпосетени музеи во 2009 година е „British Museum“ со 5,5 милиони посетители и со дури три милиони заостанува зад Лувр! Како и сите британски музеи, тој дозволува бесплатен влез за посетителите кои се интересираат за неговата величенствена поставка на целокупната историја на човештвото.

Трет на листата е Њујоршкиот „Метрополитен“ со 4,9 посетители.

И додека европските музеи водат според бројот на посетители на постојните поставки, Токио е рекордер по бројот на посетителите на една изложба. Имено, изложбата на една од најпознатите јапонски будистички статуи- статуата на Асхура од 8 век, ја посетиле нешто помалку од милион луѓе, односно 15. 960 дневно. Статистиките велат дека според бројот на дневни посети на музеите, убедливо водат париските и њујоршките музеи.

Многумина се прашуваат што е со музеите на Ватикан и Сикстинската капела, која ја нема на листата, а во 2008 година ги посетиле 4,3 милиони посетители. Невозможно е бројот на нивните посетители да падне под два милиона за само една година.