Милошоски бара смртна казна за убијците од Смилковско езеро

„За свирепо масовно убиство, како она кај Смилковци, треба да има смртна казна за злосторниците“, напиша Антонио Милошоски на својот профил на „Твитер“

Светлана Унковска


Смртна казна за сторителите на петкратното убиство кај Смилковци побара екс-министерот за надворешни работи Антонио Милошоски, кој на својот Твитер профил напиша дека „за свирепо масовно убиство, како она кај Смилковци, треба да има смртна казна за злосторниците“. Колку и да изгледа на прв поглед како единствена прифатлива казна за сторителите на ова грозоморно убиство, сепак кога ќе се прочита ваквото размислување на екс-шефот на дипломатијата и актуелен претседател на собраниската Комисија за надворешни работи, не може да не се постави прашањето дали е тој поборник за воведување смртна казна во нашава земја и тоа кога во светот постои тенденција за нејзино укинување.

Македонија е една од многуте земји во кои не се применува егзекуција како најстрога казна, туку се изрекува доживотен затвор, со кој осуденикот во затвор може да помине најмногу 20 години.

„Тоа е мое мислење. Прво сум против смртната казна како вообичаен дел од казнениот систем, но за злосторства од ваков вид или како што е тоа случајот со Брејвик, мислам дека треба да постојат исклучоци. Тоа го чувствувам и имав потреба да го кажам, бидејќи кога некој направил такво злосторство и мојата држава ја доведе до раб на дестабилизација, мислам дека за такви случаи треба да има исклучок“, ни изјави Милошоски.

Поранешниот министер за надворешни работи Милошоски, како што е познато е и припадник на првата постава на конзервативната партија ВМРО-ДПМНЕ која ја слави религијата и е против абортусот. Тие две работи се косат со присилното запирање на животот како што е смртната казна, бидејќи религијата вели дека само Бог дава и одзема живот. Оттука и страничните обиди на владејачката ВМРО-ДПМНЕ да воведе забрана на абортусот.

Милошоски, како поранешен шеф на дипломатијата вели дека е запознаен со трендот за укинување на смртната казна, но сепак тоа не го предомислува во неговите размислувања.

„Познати ми се светските трендови, но јас сум за тоа да не биде вообичаена практика, туку да се применува само во исклучиви, свирепи и масовни убиства и во такви случаи мислам дека таква мерка не би била несоодветна. Се разбира дека треба да биде строго дефинирана, со апсолутно докажување на вината, ако е потребно и со потврдување на пресудата од друг судија или пак одлука од судски совет“, смета Милошоски.

Светските искуства укажуваат дека со развојот на настаните со примената на смртната казна минатата година го потврди глобалниот тренд кон укинување на овој вид начин на казнување. Бројот на земјите кај кои се изрекува најстрогата казна е во опаѓање, а се уште е во примена во 20 земји, од кои најмногу во земјите на Блискиот Исток особено во Иран, потоа во Кина, а, како што ги нарекуваат, меѓу првите џелати се и Северна Кореја, Саудиска Арабија, Сомалија, САД и Јемен. Позабрзано укинување на смртната казна има во земјите на САД, од кои неодамна Илиониос стана 16 земја што се откажа од егзекуција на осудениот, а во тек е покренување процес и во Конектикат. Ваквиот вид казна се смета за сурова, нечовечка и која го крши правото на живот прокламирана во Универзалната декларација за човекови права, а против неа, без исклучок, е и Амнести интернешнел.

Овој јавен настап на Милошоски ја продолжува серијата на контрадикторни струи од ВМРО-ДПМНЕ, бидејќи во исто време кога тој го постираше својот став на Твитер, неговиот сопартиец Илија Димовски кој припаѓа исто така на првата постава на ВМРО-ДПМНЕ, на истата социјална мрежа изрази задоволство од црковното обраќање на владиката Агатангел во Велес, славејќи го масовнотол присуство на верниците.