Насловна

Никола Попоски нов шеф на дипломатијата?

Именувањето на амбасадорот во ЕУ за шеф на дипломатијата ќе биде едно од изненадувањата

Светлана Унковска

Амбасадорот на Македонија во Европската унија, Никола Попоски, е новото и сосема неочекувано име за кое се вели дека ќе биде идниот министер за надворешни работи. Истовремено се додава дека иако претставува големо изненадување, тој е еден од најсериозните кандидати за наследник на Антонио Милошоски.

Извори од Министерството за внатрешни работи за „Утрински весник“ велат дека Попоски деновиве бил во земјава и дека, наводно, честопати навраќал во министерството, па дури и дека почнал да се вселува во кабинетот. Директорот на Центарот за комуникации на ВМРО-ДПМНЕ, Илија Димовски, не сакаше ниту да потврди ниту да демантира, туку само кратко одговори дека „нема информации“.

Дали именувањето на амбасадорот во ЕУ за шеф на македонската дипломатија ќе биде едно од изненадувањата што ги најавува ВМРО-ДПМНЕ ќе биде познато наскоро, а најдоцна до понеделник за кога се очекува дека мандатарот Никола Груевски до Собранието да го достави составот на новата Влада. Најверојатно, и заминувањето на Милошоски беше едно од пакетот изненадувања на идната Влада, но политички кругови коментираат дека доколку амбасадорот Попоски биде поставен на чело на министерството тоа ќе биде само непријатно изненадување.

Иако нема сериозно политичко, но и дипломатско искуство, сепак, 32-годишниот Попоски лани директно седна на најжешката амбасадорска фотелја, што уште тогаш се оценуваше како лансирање анонимус во дипломатската орбита.

За првата позиција во министерството во изминатите десетина дена како можни решенија се вртеа неколку имиња. Беа спомнувани преговарачот за името и амбасадор во САД, Зоран Јолевски, вицепремиерот за евроинтеграции, Васко Наумовски, советникот на премиерот Груевски, Андреј Лепавцов, министерката за внатрешни работи, Гордана Јанкулоска, како и претседавачот со 62. Генерално собрание на Обединетите нации, д-р Срѓан Керим.

Сите дилеми околу оваа и другите министерски кадри ќе бидат познати деновиве, за што потврдуваат и од Демократската унија за интеграции (ДУИ) на Али Ахмети. Од оваа партија вчера ни потврдија дека имаат закажано средба на партискиот врв на која требаше да ја затворат листата со нивните кадровски решенија за петте министерски и двете вицепремиерски позиции.

Како можни решенија остануваат Муса Џафери или Абдулаким Адеми за местото вицепремиер за спроведување на Рамковниот договор и Теута Арифи за евроинтеграции. Како министер за одбрана се споменува Талат Џафери, во Министерството за правда се очекува да седне Блерим Беџети, во ресорот економија останува Фатмир Бесими, а како ново име се споменува Реџаил Исмаили во Министерството за животна средина. Истите извори посочуваат дека се' уште се водат преговори за директорските позиции, како и за отворените политички прашања околу затворањето на хашките случаи, борците на поранешната ОНА, употребата на албанскиот јазик и на симболите. (Св.У.)