Светски кујни
Волшебни комбинации без сечкање и без запршки
Кинеската кујна, една од најпопуларните во светот, користи цели продукти и задолжително го употребува соја сосот
Што е тоа што кинеската храна ја прави толку популарна на сите меридијани и покрај тоа што најголем дел од светот држи до тоа дека „Исток е Исток, а Запад е Запад“ и тие два света никогаш нема да се сретнат?
Една од причините за големата популарност на кинеската храна е тоа што станува збор за друштвена храна. Овие оброци се наменети за групи луѓе, не за поединци, а тоа е и причината што тие се и многу обилни и разновидни за разлика од оброците што се карактеристични за другите национални кујни. Кога на сето ова ќе се додаде и основното кинеск�� правило дека и најскромниот оброк мора да се состои од најмалку пет јадења, јасно е зошто кинеската храна е вистински рај за очите.
Уште една причина зошто кинеската храна е толку популарна е тоа што таа поради својата разновидност и мешаност може да му се допадне и на најпребирливиот вкус (ако не се, барем едно јадење).
За посебниот вкус на кинеската храна придонесува и познатото кинеско мајсторство за термичка обработка на храната. За добро организираните кинески оброци придонесува и брзината со која се сервира храната, т.е. завршувањето на шпоретот и носењето на масата не се мери со минути, туку со секунди. Храната се подготвува брзо и тоа се' со цел да се истакнат природните својства и да се зачуваат природните вкусови и мириси.
За богатството на вкусот придонесува и разновидната текстура, бидејќи Кинезите мајсторски ја користат и хармонијата и контраста во јадењата на тој начин што меките состојки ги комбинираат со тврди, крцкави и свежи елементи.
Специфичен вкус на кинеската храна и' дава сојата, која се користи во големи количества како и нејзините состојки. Кинезите со помош на сојата без никаква употреба на егзотични зачини успеваат да постигнат голем број различни вкусови.
Големата популарност за кинеската кујна доаѓа и од начинот на подготвување, кој е доста креативен. Кинезите со своите илјадагодишни зачувани пишани извори до скоро не знаеле за книгите-готвачи. Кинеските знаења се пренесувале усно од страна на учители и затоа креативниот пристап е наполно легитимен и единствен.
Секако дека постојат правила за подготовка. Продуктите се подготвуваат цели без да се сечкаат или рендаат како на Запад и сето тоа поради употребата на стапчиња. Кинезите познаваат четириесетина начини на обработка на храната покрај пржење, печење и динствување. Исто така, имаат и правила што се врзани за сосовите, зачините, комбинирање јадења, сервирање и земање на храната и носење до масата.
Што се однесува до количество и комбинациите, стандардно јадење во Кина се состои од супа, јадења од месо, јадења од живина, риба или од плодовите на морето, ориз, јадења од зеленчук или варена тестенина.
И уште нешто - богатата палета на вкусови оваа светска кујна ја смета за особено силен афродизијак. Токму затоа ја препорачуваат за пребродување на брачните кризи.
Рецепти
Свинско со кикиритки
Потребно:
125 г посно свинско месо, 50 г свежи краставици, 25 г свежо излупени кикиритки, 5 мл бело вино, 20 г густин, 40 мл масло, една белка од јајце, соја сос, праз, супа , лешник (по вкус).
Приготвување:
исечкајте ги свинското месо и краставицата на коцкички. Во посебен сад испржете ги кикиритките. Во друг сад помешајте ги свинското, солта, белките и половина густин растворен со ладна вода, мешајте и се' добро соединете. Во друга чинија измешајте ја супата со остатокот од густинот, солта, соја сосот и празот. Загрејте масло, исцедете го месото и ставете да се пржи, а притоа постојано мешајте. Потоа додадете ги кикиритките и пржете половина минута со постојано мешање. Пред сервирање, месото попрскајте го со пикантен сос.
Кинески сутлијаш
Потребно е: 150 г ориз, 200 г шеќер, 100 г суво грозје, 2 лажици густин.
Приготвување: оризот сварете го и процедете. Посипете го со половина од подготвениот шеќер и промешајте за шеќерот да се растопи. Намачкајте го калапот за пудинг со путер и посипете со суво грозје, а преку него посипете го оризот, кој со лажичка благо ќе го збиете. Калапот ставете го во сад за готвење и варете половина час. За тоа време сварете малку вода со преостанатиот шеќер и додадете го густинот, мешајте додека не се згусне. |
