Насловна

Поглед

Психолошки тестови

Гордана Дувњак

Неколкумина идни судии и јавни обвинители деновиве сe изложени на пробни тестови. Холандски експерти ја проверуваа издржливоста на македонските млади правници на стресни ситуации. Преку прашања и одговори ќе се видело колку кандидатите имале потенцијал за работа во непредвидливи ситуации и под притисок. Идните судии да ни биле не само професионалци што го знаат словото на законот туку и личности со кредибилитет и интегритет. Идејата била преку одговори на прашања да се види како поклониците на Јустиција ќе се однесуваат во конкретни ситуации, во кои крвта зоврива и лесно се губат нервите.

Барањето за проверка на психолошките особини на идните судии и обвинители наидува на одоб��ување на дел од јавноста. Многумина сметаат дека токму оние што се одговорни за пресудување и одлучуваат за битни сегменти од нашите животи, мора да бидат избрани со многу внимание. Други, пак, и во овие новини препознаваат непотребна шминка, но и начин за елиминирање неподобни кандидати. Но, и бегање од суштинските прашања што се неопходни за создавање профил на независен судија и обвинител.

Регрутирањето судии и обвинители се' повеќе личи на избор на „супермени“ или космонаути за лет во вселената. Не верувам дека некој има против подигнувањето на стандардите во одделни професии. Но, не е ли малку лицемерно да се прави тоа, а во исто време токму политиката да врши силна пресија врз македонското правосудство. Без срам и перде. И тоа оние што тешко би ги поминале психолошките тестови. Не само затоа што никој не бара од нив таква тапија, туку и затоа што ќе паднат како круши.