„Заедно можеме повеќе“ - ново мото на ВМРО-ДПМНЕ

На првиот работен ден по одморите, Груевски го претстави Трајановски како кандидат на ВМРО-ДПМНЕ за градоначалник на Скопје

Бојан Шашевски


Освежен од одморот во Фетије во Турција, претседателот на Владата го искористи првиот работен ден за да се качи на импровизирана бина кај Соборниот храм и да го претстави новиот слоган „Заедно можеме повеќе“. Со него владејачката партија ќе јуриша кон претстојните локални избори. Ќе се натпреварува и старо-новиот кандидат на ВМРО ДПМНЕ за Скопје, моменталниот градоначалник Коце Трајановски.

Иако не се појави на единаесетгодишнината од потпишувањето на Рамковниот договор, премиерот Груевски вчера се потруди да дојде на отворањето на скопската сообраќајна артерија „Св. Климент Охридски“. Притоа, премиерот одвои куп пофални зборови за Трајановски и за време на говорот, кој претставуваше идеална содржина за мини-митинг, посочи дека работи со мудрост и трпение, со волја и труд за функционален и модерен град. Трајановски, пак, во негов стил, врати со отчет за сработеното. Со ова, практично, премиерот на Трајановски повторно му ја обезбеди и официјализира градоначалничката патека за изборната трка во март.

„Скопје веќе не е истиот град како што беше пред три или четири години. Се гради насекаде, Скопје е едно големо градилиште. Таквото темпо е забележително во секој дел од градот. Се работи со полна пареа и паралелно на сите проекти, токму онака како што беше во изминатиов период. Чекор по чекор се решаваат голем дел од проблемите на граѓаните, наталожени со години. Скопје, конечно, го има вистинскиот градски татко со точни и прецизни планови и за наредните неколку години“, рече Груевски на пуштањето на булеварот „Св. Климент Охридски“.

Судејќи според зборовите на премиерот, новиот кампањски слоган „Заедно можеме повеќе“ ќе го претставува здруженото работење на сите во Владата, градоначалниците, претпријатијата, советите на општините, граѓаните...

„Овој слоган претставува прогрес во проектите. Заедничко развивање на проектите и решавање на проблемите на граѓаните. Слоганот ќе го продолжиме и по изборите. Слоганот е филозофија на живеење, начин на кој треба да размислува секој човек“, рече Груевски, додавајќи освен ветувања, Трајановски донел и многу дела.

„Тоа не му тргнало на никој друг градоначалник. Има проекти во сите општини, дури и онаму каде што се чека на решенија и потписи од различни градоначалници“, рече Груевски.