Насловна

Поглед

Стимул за матни пари

Катица Чангова

Кампањата го достигнува зенитот. Партиските карвани ја премеруваат државата и по должина и широчина. На патиштата калабалак, едни на север, други на југ. Политичарите митингуваат по градови, гратчиња, села, од утро до вечер. Испорачуваат големи ветувања, целата е да убедат што повеќе гласачи на 5 јуни да го заокружат нивниот број. Така се стигнува до удобната фотелја во законодавната и во извршната власт. Сите ресурси ги ставија на располагање, дури и сопствениот глас, со ризик да го изгубат. Некои лидери и кандидати последниве денови се обраќаат со непрепознатливи мутирани гласови.

А митинзите, тоа се главни емисии на каналите. Не можат да се избегнат. Кој не бил лично таму, за казна ќе гледа на телевизија. Дури и серија не може намира да се одгледа. Наеднаш упаѓа спот, дел од разговор, платена политичка програма...

Солено чини целиот овој циркус со изборните кампањи. Пак остана нејасно од кои куферчиња и чекмеџиња се вадат милиони евра за да се потрошат во дваесет дена? Пред антикорупционерите стигна првиот отчет од партиите. Ситуацијата, многу матна, а така и најдобро се лови. Потрошиле повеќе отколку што примиле. Меѓу нив оро води коалицијата на ВМРО-ДПМНЕ, пропагандата ги чинела десет пати повеќе од спонзорствата.

Кој ги финансира и им подарува толку пари на партиите нема ни сега да дознаеме бидејќи информацијава со децении е државна тајна. Ни топ не го разбива големиот сив простор исклучиво поволен за политичка корупција. Нетранспарентноста им одговара на сите партии и на финансиерите. Кога нема кој да дише во врат, а законските дупки се доволно длабоки, тогаш стимулот за вложување и за трошење е уште поголем. Користа обострана. Ќе ги фати ли некој политичарите и бизнисмените во љубовна прегратка? Досега никој не го можеше тоа.