Насловна

Гинекологија отворена само за сликање

Вчера беше пуштена во употреба само зградата, но не и клиниката, која беше полуопремена

Јасмина Јовановска


Новата Гинекологија ја отворија само за сликање, а за пациентите, како што тврдат здравствените власти, ќе биде пуштена за околу 40 дена. По првиот циркус пред околу еден и пол месец кога сакаа да ја пуштат клиниката без технички прием, вчера во употреба беше пуштена само зградата, но не и клиниката, која беше полуопремена. Од пет ката зграда, ако се собере целата опрема, прашање е дали имаше опрема само за еден кат. Во амбулантите беа ставени само гинеколошки столови и по еден компјутер, без да има инструменти. Рафтовите беа празни. Во операционите сали, пак, исто така, имаше опрема колку да се рече, по некој операционен стол и неколку инкубатори. Централниот систем работеше само во примениот дел. Струјата се исклучуваше, а вода немаше на сите катови. Важно е дека работеа лифтовите.

Недоопременоста, веројатно, беше и причина зошто новата Гинекологија сакаа да ја пуштат без поголема помпа. Дури немаше ни официјални покани од клиниката до медиумите. За настанот, медиумите беа известени од Владата, која беше само гостин на свеченото отворање на клиниката. А дека сакаа молчешкум да се отвори клиниката, покажува и тоа што само еден час пред отворањето се местеа цвеќиња и се бараше црвен килим.

И покрај ова, директорот на Клиниката за гинекологија д-р Саша Јовечевски, тврди дека целата клиника ќе проработи наскоро. „Технички прием е направен и добивме употребна дозвола за зградата и за лифтовите“, рече д-р Јовчевски. Според него, нема проблем ни со доводите за гасови. „Ќе имаме најсовремени доводи за гас - во несвест да паднеш“, ни изјави д-р Јовчевски. По свеченото отворање на зградата ќе се земат брисеви, и дури потоа ќе биде пуштена клиниката, додаде Јовчевски, одговарајќи на прашањето дали клиниката има санитарна дозвола.

Првиот лекар во државата, Бујар Османи, пак, вети, дека од денеска ќе почне клиниката да се сели дел по дел, и за 40 дена треба да се преселат сите оддели во новата зграда. Но, како ќе функционира полупразната клиника, не одговори. Тој призна дека имало одредени недоразбирања и недоречености при градбата на зградата, но дека не сакале да пуштат нова зграда со стара опрема. „Не дозволивме новата клиника да им стар инвентар и кревети, од кои дел се набавени од општествено одговорни претпријатија и донации. Ги освеживме и протоколите за лекување, а вработивме и доволно кадар и дадовме и специјализации“, додаде министерот Осамни.

Новата Гинекологија се градеше повеќе од 10 години. Нејзината вредност се проценува на околу 10 милиони евра, и тоа само зградата. Има пет ката, пет операциони сали и 176 болнички кревети на 12.000 квадратни метри. Градењето почна со јапонска донација од 5 милиони долари. Колку чини опремата, не кажаа ни раководството на Гинекологија ниту Министерството за здравство.