Насловна

Витраж

Време за карикатури

Катерина Богоева

Предизборие, вистинско време за карикатури во главниот град во кој паралелно со пролетните температури деновиве се подига и температурата на партиските митинзи. Двете изложби на карикатури отворени минатата недела, 39.Светска галерија на уметноста на хартија - Карикатура 2011 во галеријата „Остен“ и „Соочување со климата“ во Музејот на град Скопје се совпаднаа со последните денови на предвремено организираните парламентарни избори, така што постои можност до 5 јуни, денот на гласањето, да се зголеми бројот на посетителите што ќе ги видат делата на карикатуристите, бидејќи фреквенцијата на граѓаните-митингари низ центарот на Скопје деновиве е зголемена. Којзнае.

Во галеријата „Остен“ каде што е презентиран избор од пристигнатите 880 карикатури од 408 карикатуристи од 64 земји годинава, светот може да се доживее преку големите човекови теми за војната, социјалните разлики, бракот, потрошувачките општества, медиумите, еколошките катастрофи, домашните миленици, туризмот, спортот.

„Колку повеќе ги набљудувате тие карикатури, сфаќате дека тие, всушност, се огледало на нашата цивилизација низ кое ги гледаме сите неправди, односно парадоксот на животот на Земјината топка“, ќе забележи Зденко Пухин од Хрватска, годинешниот претседател на жирито на Светската галерија на карикатурата, напоменувајќи дека глобализацијата ги доближи случувањата и авторите од различни места на светот. Иако посетителите на оваа изложба и по речиси една недела од нејзиното отворање, за жал, ги нема во очекуваниот број, сепак, со секое ново издание на обновената манифестација, која три години беше во мирување, се зголемува и бројот на карикатуристите. Тоа и се очекуваше, бидејќи станува збор за една од најстарите и најголемите манифестации од овој вид во светот.

Нејзиниот директор Мице Јанкуловски е задоволен од нагорната линија по која манифестацијата се движи, а за една од многуте потврди за респектот што го ужива овој македонски бренд, ја смета и соработката со познатото Графичко биенале во Варна, каде што и претседавал со жирито на тамошната изложба отворена овој месец.

Во оваа прилика е добро што галеријата „Остен“ и Музејот на град Скопје не се многу оддалечени една од друга. Првата се наоѓа спроти зградата на Матица на иселениците на Македонија, а втората во објектот на Старата железничка станица. Оваа информација не е лошо да се повторува затоа што и многумина од граѓаните што живеат во Скопје, а во центарот не поминуваат само за време на митинг, не ни знаат каде се наоѓаат двете галерии.

Во втората галерија, значи во Музејот на град Скопје, до 8 јуни ќе биде отворена изложбата „Соочување со климата“, со карикатури на автори од Шведска и од Балканот. Поставени во централната изложбена сала, нив со карикатурите во галеријата на „Остен“ ги врзува една заедничка тема: проблемите со загадената животна средина што предизвикуваат се' подрастичната промена на климата.

Добро е посетителите да знаат дека изложбата е дел од се' поинтензивните напори на Шведскиот институт за промовирање на одржливиот развој, но и дека цели кон поттикнување дискусија за заштитата на животната средина. Тие имаат можност да запишат ако сакаат и свои забелешки на поставената табла, одговарајќи на поставеното прашање за сопствениот придонес за климата или, пак, да нацртаат нешто. И да ги видат и карикатурите на студентите од претходно одржаната работилница на Факултетот за ликовна уметност во Скопје.

Комплетно, двојно добро доживување на актуелните светски тенденции во карикатурата и потврда дека светот може да се гледа низ разни очила. Очилата на карикатуристите се остри, но многу привлечни.