Мартоњи
Решение за името по преговорите
07.07.2011, 15:02
Унгарскиот министер за надворешни работи Јанош Мартоњи истакна дека спорот со името не е интелектуално прашање кое било кој може да се реши со креативна мисла, туку е политичко прашање и решението мора да биде во интерес на двете страни.
Мартоњи, посочи дека од македонската и од грчката страна постојано во последните неколку месеци добива информации дека денот за изнаоѓање на решението за името се наближува.
- Преговорите се одвиваат со посредство на ОН. Ниту ЕУ, ниту Унгарија не може повеќе да направи освен да ги охрабрува двете страни да го изнајдат заедничкото прифатливо решение - рече Мартоњи, одговорајќи на новинарски прашања.
Тој потенцира дека ка��о член на ЕУ Унгарија има ист став со Европската комисија и со Европскиот парламент дека преговорите со Македонија би можеле да започнат без решавање на прашањето за името, со тоа што повеќе од јасен е фактот дека преговорите ќе се затворат само доколку се изнајде решение за спорот.
- Ние не гледаме пречка за почнување на преговорите порано, но во исто време сме реалисти и заради тоа не го ставивме ова прашање како точка на дневен ред. Сметавме дека на дневен ред може да се најдат само такви прашања чија веројатност за добивање одговори е поголема - додаде Мартоњи.
Посетата на новинарите од Западен Балкан на Министерството за надворешни работи на Унгарија и на неколку државни институции се реализира непосредно по завршувањето на унгарското претседателство со ЕУ.
Унгарскиот премиер Виктор Орбан вчера испрати писмо до високиот претставник на ЕУ Кетрин Ештон во кое се наведува што е можно поскоро да започнат преговорите со Македонија, за челенсто во Унијата.
|
