Хроника
Лажен инспектор ограбил пензионер
07.07.2011, 15:16
Три кривични пријави за лажно претставување, измама и измама во обид се поднесени против 43-годишниот А.Б. од Скопје, кој претставувајќи се како инспектор од полициската станица "Беко", ограбил 75-годишен скопјанец.
Според полицијата, непријатностите за пензионерот започнале пред петнаесетина дена кога на автобуска станица во центарот на Скопје му пришол непознат маж, претставувајќи му се како инспектор Зоран. Му побарал пари, но бидејќи скопјанецот не носел со себе, го натерал да го однесе дома и таму му зел 8.000 денари, наводно, за да изврши проверка на оригиналноста на парите. Во меѓувреме ја забележал и девизната книшка на пензионерот и го натерал да одат в�� банка од каде што извадиле 1.499 евра, кои, исто така, ги зел заради наводна проверка на оригиналноста. На крајот го натерал да отидат во ПС "Беко", но откако се качил на автобус, пензионерот забележал дека "инспекторот" го нема.
Десетина дена подоцна, разбојникот повторно дошол во домот на скопјанецот, прашувајќи дали ја добил пензијата. Откако добил негативен одговор, влегол во неговиот дом и извршил претрес на станот, одземајќи му два пасоша, кои, наводно, требало да се проверат. Го натерал заедно да одат во филијалата на банката за да проверат дали е пристигната пензијата, а откако се уверил дека нема пензија, му рекол дека треба повторно да се видат утредента за пак да проверат.
Притоа му се заканил дека доколку не дојде на договореното место, ќе биде тепан од "алфите", истовремено покажувајќи му пиштол во сива боја и некаква легитимација. Утредента истата приказна, пензијата не била пристигната, па се договориле да се видат наредниот ден.
Во меѓувреме, пензионерот сфатил дека е жртва на измамник, па го пријавил случајот во полиција. Надлежните ги прегледале снимките од видеонадзорот на банката, по што го идентификувале и го привеле разбојникот. (Г.А.)
|
