Насловна

Охриѓани го фалат езерото, а одат на море

Охриѓани се' почесто се одлучуваат да ги поминат летните одмори во Грција, Турција, Бугарија, но и во некоја од егзотичните дестинации

ОХРИД - Го фалат езерото, а летуваат на море. Охриѓани не се откажуваат од летните одмори надвор од државата и од својот град - туристички бисер. Грција, Турција, Бугарија и годинава се најпопуларен избор на туристички дестинации. Тоа го потврдуваат и од охридските туроператори, кои колку што „увезуваат“, толку и „извезуваат“ туристи.

„Одлучувачки фактор е цената од една, односно атрактивноста на дестинацијата, од друга страна.  Бараат се' почесто нови локации“, вели Елида Битрак од ТА „Елида турс“. Цени има за секој џеб, велат од оваа туристичка агенција. Пресудни за изборот на дестинацијата, но и она што се нуди во самата програма. Скапите аранжмани се помалку привлечни поради намалениот стандардот, но не се исклучени.

„Побогатите, кои од година во година стануваат се' помалобројни, сепак, пројавуваат интерес за крстосувањето со луксузни бродови по Медитеранот за  поелитните дестинации, како што се Шпанија, Палма де Мајорка, луксузните хотели на Хрватското приморје. Ретки, но присутни се и оние што се одлучуваат за одмор во престолнините во Скандинавија, потоа Куба, Доминиканска Република и слично, каде што одморот на овие елитни места чини од 1.500 до 2.000 евра.  Аранжманите за Тунис, Египет, пак, се веќе заборавени поради состојбите во тие земји“, додава Битрак.

Нова понуда на охридскиот пазар е семејниот пакет „Курс зелена карта“ во Банско, соседна Бугарија, со која туристите покрај одморот на прекрасниот планински предел, добиваат и сертификат, кој има важност за сите голф-терени во светот. Охриѓани се особено заинтересирани за ваков несекојдневен петдневен одмор.

„Веќе имаме одредени клиенти што престојувале и престојуваат на голф-игралиштата и се многу задоволни. Одбираат наместо на море, да се оди во планина и во вистинска смисла да се направи одмор, од една, односно од друга страна, да се искористат благодатите на голф-игралиштата, кои се посебно доживување“, вели Елида Битрак.

Во зависност од условите на хотелот, цената се движи од 312 до 730 евра, во која е вклучен и појадок - шведска маса, како и теоретски и практични часови за совладување на вештините на голф-играта.

„Ова е атрактивна понуда затоа што е пристапна до сечиј џеб. Нудиме пакет во кој е вклучено целото семејство“, вели Битрак. Пакетот на гостите, кои ќе се одлучат до 30 ноември да користат ваков несекојдневен одмор, им нуди бесплатно користење базен, фитнес-центар, сауна“, додава Елида Битрак, сопственичка на една од најстарите туристички агенции од Охрид. (В.М.)