Филипини заминува од Македонија со позитивни впечатоци
07.07.2011, 14:26
Амбасадорката на Холандија Симеоне Филипини денес оствари проштална средба со претседателот Ѓорѓе Иванов.
Амбасадорката Филипини, соопшти Кабинетот на Претседателот, искажа благодарност до македонските институции за соработката и поддршката во вршењето на дипломатските должности, но пред сe за топлиот прием и гостопримството во нашата земја за време на нејзиниот мандат. Таа нагласи дека заминува од Македонија со бројни спомени и позитивни впечатоци.
Претседателот Иванов се заблагодарил за ангажманот и неуморната посветеност на амбасадорката Филипини во изминатите четири години, кои придонеле за унапредување на односите и соработката помеѓу Макед��нија и Холандија.
Изразено е заемно задоволство од развојот и достигнатото ниво на билатералните односи, како и од зголемениот обем на севкупна соработка меѓу Република Македонија и Кралството Холандија, особено на планот на економијата, културата, туризмот. На средбата се разменети мислења за евро-атлантските аспирации на Република Македонија, како и за реформските процеси во сите општествени сфери.
Амбасадорката Филипини се заблагодари за соработката со претседателот Иванов, посакувајќи му нему и на Република Македонија многу идни успеси, а пред сe блиска реализација на напорите за интеграција на земјата во ЕУ и НАТО, се вели во соопштението.
Претседателот Ѓорге Иванов вчера оствари проштални средби со амбасадорите на Романија Адријан Стефан Константинеску, на Унгарија Ференц Кекеши и на Полска Дариус Бахура.
Пред неколку дена амбасадорот на САД Филип Рикер оствари исто така проштална средба со Иванов. Рикер ја напушта амбасадорската функција поради тоа што ќе работи како помошник заменик државен секретар за надворешни работи на САД.
|
